ABŞ Prezidenti Donald Tramp Ağ Evdə keçirdiyi mətbuat konfransından sonra jurnalistlərin Qəzza və Rusiya-Ukrayna müharibəsinə dair suallarını cavablandırıb.
Sherg.az xəbər verir ki, Tramp, Rusiya Prezidenti Vladimir Putinlə Moskvada apardıqları görüşün çox yaxşı keçdiyini bildirib. Donald Tramp, danışıqlarda iştirak edən xüsusi nümayəndəsi Stiv Vitkoff və kürəkəni, keçmiş baş müşaviri Cared Kuşnerin Putinə dair təəssüratlarını belə şərh edib:
“Prezident Putinlə çox yaxşı bir görüş keçiriblər. Bundan sonra nələrin olacağını görəcəyik”, – deyən Tramp əlavə edib: “(Putin) Müharibənin bitdiyini görmək istəyir. (Vitkoff və Kuşner) Onun müharibəni bitirmək istədiyi təəssüratını əldə ediblər. Bu təəssüratın nə qədər doğru olduğunu bilmirəm, amma onların gəldiyi nəticə Putinlə bağlı belə idi - o, müharibənin sona çatmasını istəyir. Məncə, o da daha normal bir həyata qayıtmaq istəyir.”
Tramp görüşdən hansı nəticəni gözlədiyi ilə bağlı sualı isə belə cavablandırıb:
“Bu görüşdən nə çıxacağını deyə bilmərəm, çünki tanqo etmək üçün iki nəfər lazımdır. Ukrayna məsələsində isə düşünürəm ki, işi olduqca yaxşı bir nöqtəyə gətirmişik, bu mövzuda vəziyyətimiz kifayət qədər yaxşıdır.”
