ABŞ-də yaşamaq və işləmək hüququ verən Qızıl Kart üçün müraciətlər başlayıb. ABŞ Prezidenti Donald Tramp proqramı “Yaşıl Kartdan daha yaxşı” kimi təqdim edib.
Sherg.az xəbər verir ki, Trampın bildirdiyinə görə, yeni proqram müraciət edənlərə Yaşıl Kartla oxşar şəkildə yaşamaq və işləmək icazəsi verir.
Xəbəri Ağ Evdə açıqlayan Tramp yeni tətbiq barədə bunları deyib: “Bu, həm mənim üçün, həm də ölkə üçün çox həyəcanvericidir. Əsas etibarilə bu, Yaşıl Kartdır, amma daha yaxşısı. Daha güclüsü.”
İlk dəfə fevral ayında elan edilən Qızıl Kart proqramı ABŞ-yə investisiya qoyan şəxslərə daimi yaşayış icazəsi verir. ABŞ administrasiyasının yayımladığı qərar mətninə əsasən, proqrama müraciət etmək üçün 15 min dollar ödənilməlidir.
GERİ QAYTARILMA YOXDUR
Müraciət təsdiqləndikdən sonra ölkəyə ən azı 1 milyon dollar məbləğində investisiya qoyulması şərti mövcuddur. Lakin təsdiq alınmadığı halda ilkin mərhələdə ödənilən 15 min dollar geri qaytarılmır.
Digər tərəfdən, müəssisələrin işçilərinə sponsorluq etməsi halında 2 milyon dollarla yanaşı əlavə rüsumlar da ödəmələri tələb olunur.
Qızıl Kart birbaşa vətəndaşlıq hüququ vermir, lakin daimi yaşayış icazəsi təqdim edir və vətəndaşlıq üçün müraciəti asanlaşdırır. Müraciətlərin təsdiqlənməsi bir neçə həftə çəkə bilər və müraciət edənlər müsahibəyə də cəlb oluna bilərlər.
PLATİN KART NƏ İŞƏ YARAYIR?
Qızıl Kartın rəsmi internet saytında yer alan məlumata görə, xüsusi vergi güzəştləri təqdim edən “Platin Kart” da yaxın zamanda 5 milyon dollar qarşılığında satışa çıxarılacaq. Bu kart müraciət edənlərə “ABŞ-də 270 günədək qala biləcəklərini və ABŞ xaricində əldə etdikləri gəlirlər üzrə ABŞ vergilərinə cəlb olunmayacaqlarını” vəd edir.
ARTIQ 10 MİN NƏFƏR MÜRACİƏT EDİB
Reuters xəbər agentliyinin məlumatına görə, ABŞ-ın Ticarət naziri Hovard Latnik indiyədək təxminən 10 min nəfərin Qızıl Kart üçün müraciət etdiyini açıqlayıb. Latnik Qızıl Kartı, “amerikalıdan daha az gəlir əldə edən və özləri və ya ailə üzvləri dövlət yardımı alan” Yaşıl Kart sahibləri ilə müqayisə edib.
NİYƏ TƏNQİD OLUNUR?
Yeni başlanan proqramla bağlı etirazlar da var. Demokratlar bu tətbiqi “varlı şəxslərə ədalətsiz şəkildə üstünlük verdiyi” əsaslandırması ilə tənqid edirlər.
Miqrasiya siyasətini sərtləşdirən Tramp vəzifəyə başladığı vaxtdan bəri ABŞ-də qanunsuz qalan minlərlə şəxsi deportasiya edib. İyun ayında qəbul edilən qərarla Əfqanıstan, Myanma, Çad, Konqo Demokratik Respublikası, Ekvatorial Qvineya, Eritreya, Haiti, İran, Liviya, Somali, Sudan və Yəməndən ölkəyə miqrant axını dayandırılıb.
Vaşinqtonda ötən həftə iki Milli Qvardiya əməkdaşı Əfqanıstan vətəndaşı tərəfindən güllələnib. Bu hücumdan sonra Tramp administrasiyası bütün sığınacaq müraciətlərini dayandırıb.
75 MİN NƏFƏR SAXLANILIB
ABŞ Daxili Təhlükəsizlik Nazirliyinə bağlı İmmiqrasiya və Gömrük Mühafizəsi Xidmətinin (ICE) məlumatlarına görə, Trampın vəzifəyə başlamasından bu yana keçən 9 ay ərzində 75 min nəfər ICE tərəfindən saxlanılıb.
ICE tez-tez qanunları pozmaqda və insan hüquqlarına zidd üsullardan istifadə etməkdə ittiham olunur.
