Hazırda məqsədli nikah Azərbaycanda aktualdır.
Bunu Milli Məclisin Ailə, qadın və uşaq məsələləri komitəsinin bu gün keçirilən iclasında Dövlət Miqrasiya Xidmətinin Miqrasiya siyasəti və hüquqi təminat Baş İdarəsinin Hüquqi təminat idarəsinin rəisi Nizami Quliyev deyib.
O bildirib ki, bu problem dünyada da aktualdır: “Bununla mübarizə tədbirləri çox ciddidir. Bir çox ölkələrdə azadlıqdan məhrum etmə, cərimə kimi cəzalar var. Bizim apardığımız tədbirlərdən biri qanunsuz miqrasiya ilə mübarizədir. Biz uzun müddət ölkədə qeyri-qanuni yaşamış şəxsi müəyyən edirik. Məlum olur ki, 10 gün bundan qabaq o, nikah bağlayıb. Bu zaman biz onu ölkədən deportasiya edə bilmirik, ölkəyə girişinə qadağa qoya bilmirik. Ona görə nikaha girən şəxslərdən biri əcnəbi olanda onun ölkədə qanuni olması nəzərə alınmalıdır. Bu layihə bizim üçün çox vacibdir. Nikaha daxil olan qeyri-qanuni miqrant olan əcnəbi əmək bazarında iş icazəsi olmadan əmək fəaliyyəti ilə məşğul ola bilir”.
Xarici İşlər Nazirliyinin Hüquqi Təminat İdarəsinin rəisi Hüseyn Hüseynov qeyd edib ki, təcrübədə miqrasiyanın tələblərindən qaçmaq üçün saxta nikahlara rast gəlinir: “Respublika ərazisində nikah Ədliyyə Nazirliyinin aidiyyəti qurumları tərəfindən bağlanır. Xaricdə isə bu hüquqa Azərbaycanın səfirlik və konsulluqları malikdir. Daimi nümayəndəliklərin konsulluq məsələləri ilə bağlı hər hansı səlahiyyət həyata keçirə bilməz. Xaricdə Azərbaycan vətəndaşlarının nikahı səfirlik və baş konsulluqda bağlanıla bilər. Xarici dövlətdə bağlanılan nikahların ölkə ərazisində tanınması Azərbaycanın tərəfdar çıxdığı beynəlxalq müqavilələrə əsasən tanıya bilər”.
Qeyd edək ki, Ailə Məcəlləsinə təklif olunan dəyişikliyə əsasən, ikisindən biri və ya hər ikisi Azərbaycan Respublikası ərazisində qanunsuz olan əcnəbilər və ya vətəndaşlığı olmayan şəxslər arasında nikahın bağlanmasına yol verilməyəcək.
