“Subaylıq andını pozan bütün ermənilərin katolikosu II Qareginin övladı var”.
Teleqraf xəbər verir ki, bunu erməni politoloq Davit Stepanyan deyib.
“II Qareginin böyük yaşda olan bir qızının olduğu çoxdan məlumdur. Bu, Nikol Paşinyanın bəyanatından da əvvəl məlum idi, amma heç kim dilə gətirmirdi”, - ekspert bildirib.
D.Stepanyanın fikrincə, kilsə siyasətə girməklə kilsəni müdafiəsiz vəziyyətə salıb.
“Katolikos II Qaregin və bəzi yüksək rütbəli kilsə xadimləri Rusiyanın maraqlarına xidmət edir. Kilsə daxildən təmizlənməlidir”, - erməni politoloq əlavə edib.
D.Stepanyan vurğulayıb ki, obyektiv araşdırma aparılsa, bəzi kilsə xadimləri cinayət məsuliyyətindən yayına bilməyəcəklər.
Ermənistan KİV-in məlumatına görə, II Qareginin qızının adı Xatun Qriqoryantsdır.
Sosial medianın Ermənistan seqmentində X.Qriqoryantsın fotosu da yayılıb.
Xatırladaq ki, bundan əvvəl Ermənistan Baş naziri bütün ermənilərin katolikosu II Qregini subaylıq andını pozmaqda ittiham edib. Paşinyanın sözlərinə görə, subaylıq andını pozaraq övlad sahibi olan Qaregin artıq Erməni Apostol Kilsəsinin rəhbəri ola bilməz.
Ermənistan hökumətinin başçısı Erməni Apostol Kilsəsinə yeni katolikosun seçilməsi üçün seçkilərə və koordinasiya qrupunun yaradılmasına çağırıb.
