PKK hərbi yox, informasiya savaşı mərhələsinə keçib
"TRT"nin kürd dilində (TRT Kurdi) yayım bölməsi, Güney Azərbaycanın qədim və böyük şəhərlərindən olan Urmiyanı "kürd şəhəri" kimi təqdim edib. Kanal şəhərdən hazırladığı reportajda kürd dilində və kürd musiqiləri ilə bir saatlıq süjet yayımlayıb. Bəzi ekspertlərin fikrincə, ilk baxışdan jurnalistik mövzu seçimi kimi görünən bu süjet, təəssüf ki, pərdəarxasında ciddi risk faktorlarını özündə ehtiva edir.
Məsələ ondadır ki, "TRT Kurdi"nin süjetində Urmiya şəhərinin yalnız kürd mədəniyyəti təqdim olunur. Bu da bölgədə heç vaxt türklərin məskunlaşmadığı və ya artıq "keçmişdə qalmış" bir qrup olduğu təəssüratını formalaşdırır. Halbuki Urmiya sadəcə coğrafi ərazi deyil, Azərbaycan türklərinin mədəni və siyasi yaddaşında xüsusi yeri olan bir şəhərdir. Qədimdən bu bölgə Oğuz-Türk tayfalarının məskəni olub. Urmiyanın Qacar sülaləsinin yüksəlişində oynadığı rol, Şeyx Məhəmməd Xiyabani və Seyid Cəfər Pişəvərinin hərəkatları zamanı bu şəhərin siyasi mərkəz kimi çıxış etməsi onun türklüyünü təkcə etnik deyil, həm də tarixi fakt kimi təsdiqləyir. Düzdür, tarix boyu Urmiyada kürdlər də yaşayıb, ərazidə onların da mədəniyyəti var. Amma Azərbaycan türkləri bölgənin dominant, köklü və əsas etnosudur. Bunu nəzərə almamaq və ya təhrif etmək açıq qərəzdir.
Politoloq Turan Rzayev Sherg.az-a deyib ki, əslində, bu hadisə son zamanlar onun davamlı xəbərdarlıq etdiyi bir məsələnin nə qədər doğru və gələcək perspektivdə region üçün riskli olduğunu sübut edir. Ekspertə görə, söhbət son zamanlar təslim olduğu, silahı yerə qoyduğu deyilən, Türkiyənin 41 ildir mübarizə apardığı PKK terror təşkilatının əslində transformasiyaya məruz qalmasından gedir:
"Bir daha qeyd edirəm ki, PKK-nın mübarizəsi yeni mərhələyə keçib. Türkiyə PKK-ya hərbi baxımdan ciddi zərbələr vursa da, təşkilatın mədəni, sosial və xüsusilə də informasiya strategiyası hələ də aktivdir. "TRT Kurdi"nin bu reportajı həmin sızmanın real nəticəsidir. Medianın dili simvolikdir və hər simvol müəyyən mərkəzdən gələn mesajı daşıyır. Bu baxımdan Urmiyanın "kürd şəhəri" kimi təqdim olunması yalnız reportaj deyil, eyni zamanda mövqe bəyanatıdır. Həm Türkiyədə, həm də Azərbaycanda çoxları bir qrup PKK üzvünün silahı yerə qoymasını "terrorsuz Türkiyə" arzularının reallaşması kimi başa düşür. "TRT Kurdi"nin məlum reportajı da həmin eyforiyaya qapılmağın real fəsadıdır. Belə materiallar Azərbaycanda narazılıqla qarşılanır. Əgər bu, redaksiya səhvidirsə, dərhal rəsmi açıqlama və düzəliş olmalıdır".
