Yalnız bu halda iki dövlət arasında qarşılıqlı və ədalətli humanitar münasibətlərdən danışmaq olar
Fuad Abbasov: Rusiyada bir dənə də Azərbaycan məktəbinin fəaliyyətinə icazə verilmir
“Rusiya Azərbaycanla humanitar əlaqələrin bərpasına hazırdır”.
Bu barədə Rusiya Prezidenti Vladimir Putinin beynəlxalq mədəni əməkdaşlıq məsələləri üzrə xüsusi nümayəndəsi Mixail Şvıdkoy bildirib.
“Biz həmişə demişik ki, Rusiya tərəfdaşlarının hazır olduğu hər bir sahədə əməkdaşlığa hazırdır. Azərbaycanlı dostlarımız və tərəfdaşlarımız humanitar, elm, təhsil və mədəni sahələrdə əlaqələri bərpa etməyə hazır olduqları dərəcədə, biz də buna tam hazırıq”, - o qeyd edib.
Şvıdkoy vurğulayıb ki, Rusiya və Azərbaycanı çoxəsrlik tarix birləşdirir, iki xalq bir-biri ilə sıx şəkildə bağlıdır və hər iki ölkənin cəmiyyətlərinin əsasını təşkil edən eyni mənəvi və əxlaqi dəyərləri bölüşür.
“Mənə elə gəlir ki, bütün münasibətləri tam bərpa etməmək üçün dərin səbəblər yoxdur,” – Putinin elçisi əlavə edib.
Politoloq Fuad Abbasov Sherg.az-a deyib ki, Mixail Şvidkoy bütün siyasi karyerası boyunca ermənipərəst mövqeyi ilə fərqlənib:
"Xüsusilə onun Yeltsin dövründə Rusiya Federasiyasının mədəniyyət naziri olduğu illərdə açıq şəkildə anti-Azərbaycan və ermənipərəst fikirlər səsləndirməsinin şahidi olmuşuq.
Hazırda Azərbaycan və Ermənistan arasında birbaşa dialoqun formalaşdığı bir vaxtda Mixail Şvidkoy Rusiya və Azərbaycan arasında elmi və mədəni sahələrdə, xüsusilə humanitar istiqamətdə əməkdaşlığa hazır olduğunu bildirir. Lakin öncə ona xatırlatmaq lazımdır ki, Azərbaycan müstəqil və suveren dövlətdir. Əgər hər hansı ölkə Azərbaycanla mədəni və humanitar əlaqələr qurmaq və ya bərpa etmək istəyirsə, bu, qarşılıqlı olmalıdır.
Rusiyanın bu mövzuda mövqeyi isə ziddiyyətlidir. Belə ki, Rusiyada, o cümlədən azərbaycanlıların çoxluq təşkil etdiyi Dərbənd, Dağıstan, Maxaçqala kimi bölgələrdə bir dənə də olsun Azərbaycan məktəbinin fəaliyyət göstərməsinə icazə verilmir. Halbuki Azərbaycanda onlarla rus məktəbi, rus fakültələri, universitetlər, rusdilli kitablar, ədəbiyyat, müəllimlər, radio, televiziya və internet resursları olmalıdır. Əgər iki müstəqil və suveren dövlət arasında humanitar əlaqələrin bərpasından danışırıqsa, onda Şvidkoy ilk növbədə Rusiyada yaşayan, sayı milyonları keçən azərbaycanlıların maraqlarını nəzərə almalıdır. Həmçinin bu ölkədə Azərbaycan mədəniyyət mərkəzlərinin, məktəblərinin, uşaq bağçalarının, televiziya və radio proqramlarının yaradılmasına şərait yaradılmalıdır".
Analitik əlavə edib ki, Rusiya dövləti həmin istiqamətlərdə büdcə vəsaiti ayırmalı, eynilə Azərbaycan dövlətinin rus məktəblərinə və rusdilli təhsilə dəstək verdiyi kimi, orada da ölkəmizin vətəndaşlarının hüquqlarına və mədəni tələbatlarına hörmətlə yanaşmalıdır:
"Yalnız bu halda iki dövlət arasında qarşılıqlı və ədalətli humanitar münasibətlərdən danışmaq olar. Lakin Mixail Şvidkoyun ermənipərəst və imperialist düşüncələrini nəzərə alsaq, onun bu açıqlamasının da kökündə köhnə şovinist yanaşmanın və Rusiyanın üstün mövqeyini qorumaq istəklərinin dayandığı aydın görünür. Bu isə müasir, müstəqil Azərbaycan üçün qəbuledilməzdir".
