ABŞ Prezidenti Donald Trampın İrana qarşı genişmiqyaslı hərbi əməliyyat planını hələlik təxirə saldığı bildirilir.
Sherg.az xəbər verir ki, Vaşinqton və Təl-Əvivin İranın enerji və neft emalı infrastrukturuna zərbə endirməsi nəzərdən keçirilsə də, əməliyyat baş tutmayıb.
Bildirilir ki, Tramp qərarını Fars körfəzi ölkələrinin liderlərinin gərginliyi azaltmaq çağırışlarından sonra verib. O, "Truth Social" platformasında paylaşımında bunun "dünyanın gələcək rifahı naminə" atılan addım olduğunu qeyd edib və yaxın zamanda razılaşmanın əldə olunacağına ümid etdiyini bildirib.
ABŞ Prezidenti tərəflər arasında Hörmüz boğazının açılması və İranın nüvə proqramı ilə bağlı irəliləyiş əldə olunduğunu iddia etsə də, Tehran bunu təkzib edib. İranın Fars agentliyi danışıqlar qrupundakı mənbələrə istinadən Hörmüz boğazının yenidən açılması ilə bağlı heç bir razılaşmanın olmadığını bildirib.
Bununla yanaşı, İran rəsmiləri Vaşinqtonun düşmənçilik siyasəti davam etdiyi müddətdə boğazın açılmayacağını vurğulayaraq, silahlı qüvvələrin yüksək döyüş hazırlığında saxlanıldığını bəyan ediblər.
