ABŞ və İran arasında davam edən qarşıdurma fonunda Vaşinqtonun zərbələrinin intensivləşdiyi əsas məntəqələrdən biri də İranın Sirik şəhəri olub.
Sherg.az Anadolu Agentliyinə istinadən xəbər verir ki, ABŞ iyunun 1-də Sirikə ilk ciddi hücumunu həyata keçirərək rabitə qülləsini vurub. Həmin tarixdən etibarən şəhərdə həm hərbi, həm də mülki obyektlərə qarşı hücumlar davam edir.
Hörmüzgan əyalətində yerləşən Sirik Oman dənizinin girişində, Fars körfəzi ilə Hind okeanının qovşağında yerləşdiyi üçün strateji əhəmiyyət daşıyır. Şəhər İranın Hörmüz boğazına nəzarətində mühüm rol oynayır.
Məlumata görə, Sirikdə yerləşən limanlar, radar sistemləri, hava hücumundan müdafiə vasitələri və rabitə infrastrukturunun mövcudluğu şəhəri ABŞ üçün əsas hədəflərdən birinə çevirib. İran Silahlı Qüvvələri Hörmüz boğazından icazəsiz keçməyə çalışan gəmilərə xəbərdarlıq atəşlərini də əsasən bu bölgədən açır.
Ekspertlər hesab edirlər ki, Sirikdəki hərbi obyektlərin sıradan çıxarılması İranın Hörmüz boğazına nəzarət və müşahidə imkanlarını ciddi şəkildə zəiflədə bilər.
Bununla yanaşı, ilboyu isti və quraq iqlimin hökm sürdüyü şəhərdə su təchizatı həyati əhəmiyyət daşıyır. Su paylayıcı stansiyaların və enerji infrastrukturunun hədəfə alınması yerli əhalinin həyatına ciddi təsir göstərir.
Qeyd edək ki, İran ABŞ və İsrailin fevralın 28-də başladığı hücumlardan sonra Hörmüz boğazını bağladığını açıqlamışdı. Tehran administrasiyası Keşm və Hörmüz adaları kimi strateji məntəqələr vasitəsilə boğaza nəzarəti davam etdirdiyini bildirir.
