Cənubi Qafqazda Qərb-Rusiya toqquşması məhz İrəvanda davam edəcək
"Ermənistan Avropa İttifaqına üzvülüyünün başlanmasına dair qanunu təsdiqləyib. Lakin Ermənistan Rusiyanın orbitindəki Avrasiya İttifaqının, KTMT və Gömrük İttifaqının üzvüdür".
Bu barədə Milli Cəbhə Partiyasının sədr müavini, siyasi şərhçi Məhəmməd Əsədullazadə deyib. Ekspert bildirib ki, Nikol Paşinyan Avropa İttifaqına üzvülük sənədini təsdiqləməklə, Moskvaya qarşı yeni cəbhə açmış oldu:
"Avropa İttifaqına üzvülük üçün Paşinyan Rusiyanın orbitində olan bütün təşkilatlardan rəsmən çıxmalıdır. Ermənistanın Avrasiya İttifaqı daxilində Rusiya ilə iqtisadi əməkdaşlığı, ticarət dövriyyəsi ötən il 15 milyard dollar olub. Bu, Ermənistan üçün kifayət qədər böyük rəqəmdir. Paşinyan Avrasiya İttifaqından çıxarsa, iqtisadi əlaqələr tam zəifləyəcək. Nəticədə Ermənistan iqtisadiyyatında kifayət qədər problemler yaşanacaq. Həmçinin, Rusiya Ermənistana qarşı iqtisadi və siyasi təzyiqlərə əl atacaq. Ermənistanın avrointeqrasiyası Rusiya ilə münasibətlərin kəskinləşməsi ilə davam edəcək. Əsl həngamə Ermənistanın üzvü olduğu təşkilatlardan çıxmaq barədə qərarlar qəbul edən zaman olacaq. Ümumən, bu il Ermənistan üçün çətin və mürəkkəb keçəcək. Cənubi Qafqazda Qərb-Rusiya toqquşması məhz İrəvanda davam edəcək".
