Yerasx (Arazdəyən) - Sədərək dəmir yolu çəkilənə qədər Ermənistan blokadada qalacaq.
Sherg.az Publika.az-a istinadla xəbər verir ki, bu iddia ilə “Ermənistan” fraksiyasından olan deputat Artur Xaçatryan çıxış edib.
Revanşist qüvvələrə yaxın olan deputat regional kommunikasiyanın açılması ilə blokadanın aradan qalxacağını real hesab etmir. O təklif edir ki, Ermənistanın dalandan çıxması üçün Yerasx-Sədərək dəmir yolu tikilməlidir.
“Bu yol açılmadan “Tramp marşrutu” (Zəngəzur dəhlizi - red) tam fəaliyyət göstərə bilməz. Bu yol (Zəngəzur dəhlizi) təkcə 42 kilometri deyil, Yerasxa gedən bütün marşrutu əhatə etməlidir”, - o iddia edib.
Qeyd edək ki, Ermənistanda revanşist qüvvələr Vaşinqton anlaşmalarına, o cümlədən Zəngəzur dəhlizinin “Tramp marşrutu” adı altında açılmasına qarşı çıxır. Yerasx-Sədərək dəmir yolu xətti məsələsinin ortaya atılması da “arqumentlərini” gücləndirmək məqsədi daşıyır.
