Antalya Forumunda Ararat Mirzoyan siyasi manipulyasiya ilə məşğul olub
Ermənistan xarici işlər naziri Ararat Mirzoyan deyib ki, Azərbaycanla münasibətlərin nizamlanması prosesi Ermənistan-Türkiyə gündəliyinin bir hissəsidir. Onun sözlərinə görə, ikitərəfli olmasa da, ən azı söhbətlər və təmaslar var:
"Ermənistan-Türkiyə dialoqu kontekstində Ankara tərəfi Ermənistan-Azərbaycan münasibətlərinə görə razılaşmaların icra tempinə müəyyən məhdudiyyətlər qoyur. Əslində bizim yanaşmamız fərqlidir. İnanırıq ki, Ermənistan-Türkiyə istiqamətində irəliləyiş Ermənistan-Azərbaycan nizamlanmasına müsbət təsir göstərəcək. Ancaq qavrayışda müəyyən fərq var, buna baxmayaraq, biz faydalı, əlverişli təsir göstərmək istəyini görürük".
Siyasi elmlər doktoru, professor Elşad Mirbəşiroğlu "Şərq"ə deyib ki, Ermənistan-Türkiyə münasibətlərinin normallaşmasının Azərbaycan-Ermənistan arasındakı sülhdən asılı olması çox məntiqlidir. Professorun sözlərinə görə, İrəvan-Ankara əlaqələrinin 1993-cü ildə kəsilməsinin səbəbi məhz Ermənistanın Azərbaycana qarşı həyata keçirdiyi işğalçılıq siyasəti və Azərbaycan ərazilərini işğal etməsi olub:
"İrəvan-Bakı münasibətlərinin xarakteri eyni zamanda İrəvan-Ankara əlaqəlrərinin formalaşmasına təsir göstərir. Ermənistan bu məsələlərin bir-biri ilə əlaqələrndirilməsindən narahatdır. Ermənistan hazırda Türkiyə ilə münasibətlərin normallaşdırılmasının tərəfdarı ola bilər. Çünki Türkiyə kimi bir ölkə ilə Ermənistanın iqtisadi-ticari əlaqələrinin, siyasi münasibətlərinin normallaşdırılması kontekstində qurulması İrəvan üçün təsirli çıxış yoludur. Ona görə də A.Mirzoyan məhz bu məqama vurğu edir və İrəvan-Ankara münasibətlərinin İrəvan-Bakı əlaqələrinin xarakterindən asılı olmamasını istəyir. Ermənistan qısa zamanda Türkiyə ilə münasibətlərini normallaşdırmaq istəyində olsa da, yaxın zamanda Azərbaycanla sülhü imzalamaqda maraqlı görünmür. İrəvan Azərbaycanın prinsipial şərtlərinə əməl etmək niyyətində deyil".
Analitik vurğulayıb ki, Azərbaycan tərəfi dəfələrlə vurğulayıb ki, Konstitusiyada dəyişiklik edilməli və Minsk qrupu buraxılmalıdır: "Mirzoyan Ermənistan hökumətinin Minsk qrupunun ləğvi ilə bağlı addım atmağa hazır olduğunu desə də, İrəvanın ziddiyyətli mövqeyi hamıya bəllidir. Hansısa məsələ ilə bağlı Ermənistan tərəfi açıqlama versə də, praktiki addımlarda bunu büruzə vermir. Adətən, Ermənistan rəsmilərinin bəyanatları deklorativ xarakter daşıyır. Antalya Forumunda da Ermənistan XİN başçısı siyasi manipulyasiya ilə məşğul olub. Həm Ermənistan-Azərbaycan, həm də paralel Türkiyə-Ermənistan münasibətlərinin normallaşması birbaşa İrəvanın səmimiyyətindən asılıdır. Ermənistan Qərbin təsirindən uzaqlaşma iradəsi göstərməlidir. Qərb regionda fərqli mənzərə görmək istəyir və bu mənzərə bölgə ölkələrinin maraqları ilə heç cür uzlaşmır. Ermənistan da müstəqil davranmaq imkanlarına malik deyil. Qərbdən gələn təlimatlar əsasında öz davranışlarını formalaşdırır. Bu da regionda əməkdaşlıq imkanlarını Ermənistan üçün məhdudlaşdırır".
