ABŞ Prezidenti Donald Trampın xüsusi elçisi Kit Kelloq Ukraynanın sülh sazişi çərçivəsində “demək olar ki, İkinci Dünya müharibəsindən sonrakı Berlin kimi” bölünə biləcəyini bildirib.
“Report” xəbər verir ki, bu barədə diplomat “The Times”a müsahibəsində söyləyib.
“Bunu İkinci Dünya müharibəsindən sonra Berlindəki kimi etmək olar, o zaman rus zonası, fransız zonası, Britaniya zonası, ABŞ zonası var idi”.
Bununla yanaşı, üç illik müharibənin dayandırılmasına yönəlmiş ABŞ səylərində aparıcı fiqur olan Kelloq “sakitləşdirici qüvvələr” çərçivəsində Britaniya və Fransa qoşunlarının ölkənin qərbindəki zonaları, Rusiya ordusunun isə işğal olunmuş şərqi nəzarətə götürə biləcəyini ehtimal edib. Onların arasında Ukrayna qoşunları və demilitarizasiya olunmuş zona olacaq.
Eyni zamanda, Kelloq hesab edir ki, Ukraynanı şimaldan cənuba kəsən və Kiyevdən keçən Dnepr çayının qərbindəki ingilis-fransız qüvvələri Moskva üçün “heç də təxribatçı olmayacaq”.
Onun fikrincə, Ukrayna sülh sazişinə riayət olunmasını təmin etməyə çalışan qoşunları yerləşdirmək üçün kifayət qədər böyük ölkədir.
