Prezident çıxışında ailə və gənclərə yönəlmiş yeni sosial dəstək paketlərini də açıqlayıb
İstanbulda yerləşən Haliç Konqres Mərkəzində keçirilən “Ailə və Əhali 10 İli Vizyon Tanıtım Proqramı”nda çıxış edən Türkiyə Prezidenti Rəcəb Tayyib Ərdoğan ailə və demoqrafik siyasətlə bağlı mühüm mesajlar verib.
Sherg.az xəbər verir ki, Ərdoğan çıxışında 5 strateji hədəfi açıqlayaraq bildirib ki, 2025-2035-ci illəri əhatə edən “Ailə və Əhali 10 İli” proqramı dövlətin gələcək vizyonunun əsas istiqamətlərindən biridir.
Prezident xüsusilə 2007-ci ildən etibarən irəli sürdüyü “ən az 3 uşaq” çağırışını xatırladaraq qeyd edib:
“Aradan keçən müddət göstərdi ki, 3 uşaq çağırışımız tamamilə haqlıdır. O vaxt bizi tənqid edənlər bu gün reallığı qəbul etməyə məcbur qalırlar.”
Ərdoğan ailənin cəmiyyət üçün əsas dayaq olduğunu vurğulayaraq bildirib ki, güclü ailə güclü dövlət deməkdir. Onun sözlərinə görə, texnologiyanın sürətlə inkişaf etdiyi dövrdə ailə institutunun rolu daha da önəm qazanır.
Türkiyə lideri ölkədə doğum səviyyəsinin azaldığını və əhalinin qocaldığını qeyd edərək mövcud vəziyyəti “narahatedici” adlandırıb. O bildirib ki, doğum göstəricilərinin azalması uzunmüddətli perspektivdə ciddi risklər yaradır.
Ərdoğan həmçinin 1960-cı illərdən bəri tətbiq edilən səhv demoqrafik siyasətlərin nəticələrini tənqid edib və hazırkı qlobal tendensiyaların bir çox ölkədə oxşar problemlər yaratdığını vurğulayıb.
Prezident çıxışında ailə və gənclərə yönəlmiş yeni sosial dəstək paketlərini də açıqlayıb. Bunlar arasında:
Ailə və Gənclik Fondu vasitəsilə evlilik kreditlərinin artırılması
Doğum yardımlarının yüksəldilməsi
Valideyn məzuniyyətlərinin genişləndirilməsi
3 və daha çox uşaqlı ailələr üçün sosial mənzil üstünlükləri
Yeni strateji dövrün 5 əsas prioriteti isə belə müəyyən edilib:
Ailə institutunun qorunması
Evliliyin təşviqi
Doğum səviyyəsinin artırılması
Gənclərin inkişafı və yaşlıların rifahı
Kənd yerlərinin inkişafı və əhalinin balanslı paylanması
Ərdoğan çıxışının sonunda bildirib ki, dövlət bu sahədə bütün siyasəti ailə və demoqrafik inkişaf mərkəzli şəkildə davam etdirəcək.
