Aktyor və kinorejissor, əməkdar incəsənət xadimi Şeyx Əbdül Mahmudbəyovun mənzili yağış suları altındadır. Şeyx Əbdül Sherg.az-a deyib ki, neçə gündür yağış başına yağır:
"Mən özümə qarşı belə münasibətə artıq yol verə bilmərəm. 3 ailə bir mənzilə sığınmışıq, and olsun Allaha, yağış başımıza yağır. “JEK” müdiri də gəlib, baxır, amma heç bir iş görə bilmir. Çünki biz “zibil”ə düşmüşük. Cənab Prezident 2 dəfə göstəriş verib ki, bu ərazi köçürülsün. Amma iş getmir. Səbəbi də budur ki, ərazi hələ Hacıbala müəllimin (Hacıbala Abutalıbov - red) vaxtında alınıb-satılıb. Bir xanım alıb bu ərazini, amma 10 ildir heç bir tikinti aparmır. Yaxınlıqda gözəl yaşayış binası tikildi, camaat köçürüldü, amma biz qalmışıq ortada.
"Pul da istəmirəm, bu mənzilin əvəzinə bizə başqa yerdə ev versinlər"
Xanım da deyir ki, filan qədər pul ödəmişəm ərazinin alınmasına. Ödəmisən, get pulunu Hacıbala müəllimdən istə. Əlində sərəncam var və heç kim də gəlib burda iş apara bilmir. Neçə dəfə sakinlərə sərfəli təkliflər edən şirkətlər gəlib, tikinti aparmaq istəyiblər, bu xanımın hikkəsinə görə işə başlaya bilməyiblər. Bakı merinin də buna gücü çatmır. Daxili İşlər nazirinin qəbuluna getmişəm. Qəbuldakı soruşur, hansı məsələyə görə gəlmisiniz. Dedim, oğul, bu sənlik deyil. Səndən "böyük"lər bu işi bacarmayıb, sən nə edəcəksən, mən nazirlə görüşmək istəyirəm. Deyir, yox, əvvəlcə biz nazirə məruzə etməliyik. Çıxdım gəldim evə. Mən indi cənab Prezidentə, Mehriban xanım Əliyevaya müraciət edirəm. Mənim dərdimə çarə etsinlər. Prezident o gün də dedi ki, “konkret məlumatlarım var, hansı məmurlar mənim tapşırıqlarımı yerinə yetirmir”. Mən də o məmurlardan bəzisinin adını çəkə bilərəm. Artıq ancaq Prezidentdən, Mehriban xanımdam kömək gözləyirəm və xahiş edirəm ki, bizi burdan köçürsünlər. Pul da istəmirəm, bu mənzilin əvəzinə bizə başqa yerdə ev versinlər.75 yaşında ağsaqqal kişiyəm, Əməkdar incəsənət xadimi, Dövlət mükafatı laureatı, Milli kino mükafatı sahibi ailəsi ilə yağışın altında qalıb. Bir ata kimi istəyirəm balalarımın normal mənzil şəraiti olsun. İndi mənə belə münasibət varsa, öləndən sonra hansı münasibət olacaq? Balalarım qalacaqlar küçədə".
Ş.Əbdüldən ona verilmiş yeni mənzildə niyə yaşamadığını da soruşduq:
"Çox sağ olsunlar, mənzil veriblər, amma o mənzil “podmayak”dı. Yəni, quruca 4 divardı. Onu təmir etmək üçün ən azı 1 il vaxt və 50-60 min də pul lazımdı. Ona görə də ora köçə bilmirik. Köhnə mənzildə qalmışıq. Yağış da başımıza yağır".
