Seymur Herş: ABŞ Yaxın Şərqdə müttəfiqlərinin dəstəyini və hörmətini itirir
ABŞ Prezidenti Donald Trampın administrasiyası İranla ağır hərbi qarşıdurmaya cəlb olunub. Müharibə fonunda Vaşinqton Yaxın Şərqdəki müttəfiqlərinin dəstəyini və hörmətini itirir.
Sherg.az xəbər verir ki, bunu amerikalı jurnalist Seymur Herş Substack platformasındakı bloqunda yazıb.
“Tramp administrasiyası İrandan gələn raket və dronların onlara dəqiq zərbələr endirə bilməsi səbəbindən zərər çəkən Yaxın Şərqdəki bir çox uzunmüddətli regional müttəfiqlərinin dəstəyini və hörmətini itirir”, - Herş bildirib.
Jurnalistin sözlərinə görə, Tramp gözlədiyindən daha mürəkkəb olduğu ortaya çıxan İran müharibəsində ilişib qalıb. İran müqavimətini davam etdirir, baxmayaraq ki, dondurulmuş aktivlərinə ehtiyacı var. Bu isə ABŞ-ın ən azı qısa müddətdə Hörmüz boğazına nəzarəti itirə biləcəyi anlamına gəlir.
Herş hesab edir ki, bu vəziyyət ABŞ-da benzinin qiymətlərinin aşağı salınması şanslarını azaldır və respublikaçıların Konqresə aralıq seçkilərində qələbə ehtimalını daha da zəiflədir.
Bundan əvvəl ABŞ Prezidenti Donald Tramp administrasiyasına İranla əlaqələri dayandırmağı və Tehranla danışıqlar prosesinə son qoymağı tapşırıb. Vaşinqton artıq müttəfiqlərini İran siyasətində yanaşmanın dəyişməsi barədə məlumatlandırıb. ABŞ administrasiyası “İranı mümkün qədər tez məğlub etmək” strategiyasını zamanla ölkəni “boğmaq” yanaşması ilə əvəz edib.
Tramp daha əvvəl Vaşinqtonun əsas məqsədinin İranın nüvə silahına sahib olmasının qarşısını almaq olduğunu bildirib.
