Ağ Ev ABŞ Prezidenti Donald Trampın sağlamlıq hesabatını yayıb. Hesabata əsasən, Tramp “mükəmməl formada”dır və ürək yaşı real yaşından 14 il daha cavan hesab olunur.
Sherg.az xəbər verir ki, 79 yaşlı Tramp bu ilin yanvarında yenidən vəzifəyə başlayaraq ABŞ tarixinin ən yaşlı prezidenti olub. Lakin onun həkimi Şon Barbabella bildirib:
“Prezident Tramp əla sağlamlığa malikdir, güclü ürək-damar, tənəffüs, sinir və fiziki performans nümayiş etdirir.”
Yaxın Şərq səfəri öncəsi tam müayinə
Məlumata görə, Trampın Yaxın Şərqə planlaşdırılan səfəri ərəfəsində qrip və COVID-19 peyvəndləri yenilənib. Ağ Ev sözçüsü Karolin Leavitə ünvanlanan qeyddə bildirilir ki, Tramp Walter Reed Hərbi Tibb Mərkəzində illik rutin müayinədən keçib.
Qolf performansı da təriflənib
Apreldə aparılan ətraflı tibbi yoxlamada ABŞ Prezidentinin boyunun 1.90 metr, çəksinin isə 102 kiloqram olduğu qeyd edilib. Xolesterol səviyyəsinin isə “normal və nəzarət altında” olduğu bildirilib.
Hesabatda həmçinin Trampın fiziki dözümlülüyü və qolf bacarığı yüksək qiymətləndirilib.
Ayaq şişməsi və əl qaralması ilə bağlı iddialar
İyul ayında Trampın ayaqlarında şişlik və sağ əlində qaralma müşahidə olunması ictimaiyyətdə müzakirələrə səbəb olmuşdu.
Mütəxəssislər bunun, 70 yaşdan yuxarı şəxslərdə tez-tez rast gəlinən xroniki venoz çatışmazlıq nəticəsində baş verə biləcəyini, əldəkı qaralmanın isə əllə təmas və aspirin istifadəsi ilə əlaqəli toxuma qıcıqlanması ola biləcəyini qeyd etmişdilər.
Ağ Ev həmin vaxtdan etibarən bu narahatlıqları “əhəmiyyətsiz” adlandırır.
Baydenlə müqayisə və sağlamlıq mübahisələri
Trampın sağlamlıq hesabatı, onun sələfi Co Baydenin ötən il yaşını və sağlamlıq durumunu əsas gətirərək yenidən namizədliyini geri çəkməsindən sonra daha da diqqət mərkəzinə düşüb.
Seçki kampaniyası dövründə Tramp özünü “daha gənc və enerjili lider” kimi təqdim edirdi.
Qeyd edək ki, Trampın sağlamlıq vəziyyəti ilk prezidentlik dönəmində də müzakirə doğurmuşdu. O, COVID-19-a yoluxduğunda, Ağ Ev vəziyyətin ciddiliyinə dair ziddiyyətli açıqlamalar vermiş və xəstəliyin miqyası uzun müddət gizli saxlanılmışdı.
