Türkiyənin Bursa şəhərində bir qızıl istehsalçısı, yeyilə bilən qızıl hazırlayıb. Toz halına salınmış bu qızılın qramı 4500 lirəyə satılır və bir çox xəstəliklərə müsbət təsir etdiyi bildirilir.
Sherg.az xəbər verir ki, Bursada yaşayan qızıl istehsalçısı Əkrəm Filiz, qızılın içindəki zərərli birləşmələri ayıraraq onu yeyilə bilən hala gətirib.
Hazırladığı qızıl tozuna Türkiyə Kənd Təsərrüfatı və Meşə Nazirliyindən əlavə qida əlavəsi olaraq təsdiq alan Filiz, qızılın tərkibindəki mineralların bir çox xəstəliyə yaxşı gəldiyini bildirib.
Filiz bildirib ki, toz halındakı məhsulda 24 karat qızıldan başqa heç bir qatqı maddəsi yoxdur. Tamamilə saf qızıldan hazırlanan məhsulun 1 qramı 4500 lirəyə satılır.
Şirniyyatlarda və yeməklərdə istifadə olunur
24 karat qızıldan başqa heç bir maddə istifadə etmədiyini vurğulayan Əkrəm Filiz deyib:
“Məhsulumuzu ən az 1 qram olaraq satırıq. Qızılın formasını dəyişdirərək onu suda həll olan toz halına gətiririk. Heç bir rəngləndirici və ya dadlandırıcı istifadə etməmişik. 24 karatlıq 1 qram məhsulun hazırkı qiyməti 4500 lirədir, amma qızılın məzənnəsindəki dəyişiklik məhsulun qiymətinə də təsir edir.”
Suyla qarışdırılıb gündə 5 damla şəklində istifadə edildikdə təxminən 20 gün kifayət etdiyini bildirən Filiz əlavə edib:
“İstəyənlər bu tozu yeməklərinə və ya desertlərinə əlavə edə bilərlər. Qızıl dünyanın ən keyfiyyətli minerallarından ibarət olan bir metaldır.”
