Yaponiyada “Dovşan Adası” kimi tanınan Okuno adasında yeddi dovşanı döyərək öldürdüyü və ya yaraladığı müəyyən edilən şəxsə 3 il şərti olmaqla 1 il həbs cəzası verilib.
Sherg.az Kyodo xəbər agentliyinin məlumatına istinadən məlumat verir ki, Yaponiyanın qərbində yerləşən adada dovşanlara işgəncə verməkdə təqsirləndirilən 25 yaşlı Riku Hotta bu gün məhkəmə qarşısına çıxarılıb. Hiroşima Rayon Məhkəməsi, Hottanın dovşanlara təpik atmaq və ağızlarına qayçı salmaqla pis rəftar etdiyini təsdiqləyib.
Məhkəmə hakimi Vataru Şimazaki, bu davranışı “şər niyyətli” adlandıraraq sərt şəkildə qınayıb və təqsirləndirilən şəxsin ittihamları qəbul etdiyini və əməlləri üzərində düşündüyünü bildirib.
Hotta, bu ilin yanvar ayında heyvanlara pis rəftar ittihamı ilə saxlanılmışdı. Saxlanmazdan əvvəl bir dovşana təpik atdığı və həmin dovşanın sonradan öldüyü bildirilmişdi.
Okuno Adasında hazırda təxminən 500 yarı vəhşi dovşan yaşayır. Yaponiya Ətraf Mühit Nazirliyi, son hadisədən sonra adada əlavə təhlükəsizlik kameraları quraşdırmağı nəzərdən keçirir.
