Bu il Ramazan ayı elə bir aya təsadüf edib ki, oruc tutanlar istidən və susuzluqdan bir o qədər də təsirlənməyəcəklər. Qidalanmaya gəldikdə, çox zaman oruc tutanlar imsak və iftar zamanı o qədər çox yeyir ki, bu sonradan onların səhhətinə zərər verir. Bu ayda gündə iki dəfə yemək yemək və orqanizmi təmizləmək, qısası sağlam qidalanmaq lazımdır.
Bəs, oruc tutanlar sağlam qidalanmaq üçün imsak və iftar vaxtı hansı qidalara üstünlük verməlidirlər?
Mövzu ilə bağlı qida məsələləri üzrə mütəxəssis Ağa Salamov "Sherg.az"a açıqlamasında söyləyib ki, oruc tutan biri gün ərzində susuz qaldıqları üçün duzlu yeməklərdən uzaq durmalıdır:
"Yəni şoraba, kolbasa, sosiska kimi qidalardan istifadə etmək düzgün deyil. Faydalı karbohidratların qəbulu məqsədəuyğundur. Məsələn, sübh vaxtı gül kələmi, mərci şorbası içmək olar. Bu yemək növləri mədəni yumşaldır və vitamin,minerallarla zəngin olduğu üçün gün ərzində insanı tox tutur. Səhər vaxtı yumurta əvəzolunmazdır. Süfrəyə əncir qurusu və zeytun mütləq qoyulmalıdır. Kənd toyuğunun yumurtası omeqa-3 ilə zəngindir və tərkibində aminturşuları var. İmsak və iftar vaxtı qazlı sular içmək olmaz. Bu içkilər insan sağlamlığına ziyandır və susuzluğa gətirib çıxarır. Çünki orqanizm lazım olan mineralları almır. İftarda aqressiv qidalanmaq olmaz. Məsələn, ictimai iaşə müəssisələrində, evdə oruc tutan şəxs iftar vaxtı cəld süfrəyə hücum çəkir. Bu zaman həmin adam özü də bilmədən şorba içir, salat, ana menyudakı yeməkdən, xurmadan yeyir. Bir sözlə, bütün yeməkləri qarışdırır. Sonda mədə-bağırsaqda dözümsüzlük, həzmsizlik yaranır".
A. Salamov qeyd edib ki, iftar vaxtı yarım porsiya şorba, 100 qram tərəvəz salatı yemək olar:
"Təxminən 10-15 dəqiqədən sonra ana yeməyə keçmək olar. Ət, toyuq, balıq yemək daha məsləhətlidir. Ancaq bunu da miqdarında tənzimləmək lazımdır".
