Ukraynanın iyunun 1-də Rusiya aerodromlarına hücumundan və çoxsaylı bombardmançı təyyarələrin məhv edilməsindən sonra Kiyev Moskvanın müvafiq addımlarına hazırlaşır. Amma Rusiyanın bunu edib-etməyəcəyinə dair suallar var.
Bu barədə CNN-nin analitik materialında deyilir.
Amerikalı analitiklərin fikrincə, Rusiyanın cavab addımlarını məhdudlaşdıran bir neçə amil var, bunlardan birincisi siyasidir.
“Hörümçək toru” əməliyyatına genişmiqyaslı cavabın verilməsi Ukraynanın Rusiyaya ciddi zərbə vurduğunu etiraf etməyə bərabər olardı. Kreml bundan qaçır”, - ABŞ-nin Müharibə Araşdırmaları İnstitutunun Rusiya üzrə eksperti Katerina Stepanenko deyib.
CNN əlavə edir ki, Rusiya lideri Vladimir Putin də maddi məhdudiyyətlərlə üzləşib.
“Rusiyanın öz hərbi gücündən müharibədə davamlı istifadə etməsi, onun cavab imkanlarını məhdudlaşdırır”, - NATO-nun keçmiş zabiti Uilyam Alberk bildirib.
Xatırladaq ki, Ukrayna Milli Təhlükəsizlik Xidmətinin iyunun 1-də keçirdiyi “Hörümçək toru” adlı əməliyyat nəticəsində 41 Rusiya təyyarəsi, o cümlədən A-50, Tu-95, Tu-22 M3 və Tu-160 vurulub. Bu əməliyyat ilyarımdan çox müddətə hazırlanıb. Ukrayna PUA-ları eyni anda Rusiyanın 4 hərbi aerodromunda - Belaya, Dyaqilevo, Olenya və İvanovodakı hədəflərə hücum edib.
Siyasi şərhçi Elmir Səftərov Sherg.az-a bildirib ki, Rusiya müharibə başladığı dövrdən bu yana Ukraynayanın müxtəlif şəhərlərinə kütləvi dron və raket zərbələri endirərək ciddi ziyan vurub:
"Uzun müddətdir davam edən müharibədə Ukraynanın iyunun 1-də Rusiya aerodromlarına hücumundan sonra Moskva qisas almaq barədə düşünməkdən çox rəqibin yeni hücümlarını aradan qaldırmağa, baş verə biləcək bənzər halların qarşısını almağa, həmçinin döyüş meydanında uğurlar qazanaraq gələcək danışıqlarda əlini gücləndirməyə çalışır.
Buna baxmayaraq, rəsmi Kreml Ukraynanı daha da zəiflətmək üçün Kiyevin dərinliklərindəki əsas istehsal və qərar qəbuletmə mərkəzlərini məhv etməyə səy göstərəcək. Rusiya onsuz da indiyədək Ukraynaya sarsıdıcı zərbələr endirərək, şəhərlərini və infrastrukturunun bombalayıb".
Şərhçi əlavə edib ki, Rusiya artıq bu cür hücumlarla Ukraynanı diz çökdürə bilməyəcəyinin fərqindədir:
"Ona görə də Rusiya tərəfi çox güman ki, Ukraynanın hərbi obyektlərinə, ölkəyə gətrilən zəruri yardımlara, eyni zamanda, aerodromuna zərbə endirməyi daha məqsədəuyğun hesab edir. Çünki Moskva anlayır ki, Ukrayna bundan sonra da boş durmayacaq, Rusiyaya qarşı yeni əməliyyatlar hazırlacaq".
