"Bu gün Avropanın daha çox Azərbaycan qazına ehtiyacı var".
Bunu Prezident İlham Əliyev 3-cü Şuşa Qlobal Media Forumunun iştirakçıları ilə görüşündə deyib.
Dövlət başçısı bildirib ki, Azərbaycan bu həcmi artırmağa hazırdır. Prezidentin sözlərinə görə, 2021-ci ildə bu rəqəm 8 milyard kubmetr idi, bu gün isə 13 milyard kubmetrdir: "Bu, bizim ümumi hasilatımızın və ixracımızın yarısıdır. Əlavə həcmlər üçün isə Avropa institutları ilə bağlı yenidən praqmatik yanaşma olmalıdır".
Prezident deyib ki, bu gün Cənub Qaz Dəhlizi maksimal həcmdə fəaliyyət göstərir: "Yeni məkanlar üçün biz interkonnektorlardan istifadə edirik. Ancaq əsas boru kəməri tam həcmdə doludur. Genişlənmə üçün bizim əlavə maliyyə vəsaitinə ehtiyac var. Ona görə Avropa maliyyə institutları bunu nəzərə almalıdırlar və siyasətlərində dəyişiklik etməlidirlər ki, biz əlavə vəsait cəlb edə bilək. Bu şəraitdə bu gün bizim üçün artıq başa çatmış bir məsələ olan mövzu yenidən inkişaf etdirilə bilər”.
Millət vəkili Asim Mollazadə “Sherg.az”a bildirib ki, Azərbaycan Avropa ilə normal əməkdaşlıq edir:
“Avropa deyəndə birmənalı sistemi nəzərə almaq olmaz. Azərbaycanın bir sıra ölkələrlə strateji tərəfdaşlıq və iqtisadi sahədə bağları var. Bununla yanaşı, Azərbaycan Avropanın təhsil sistemi ilə də əməkdaşlıq edir, hətta elmi sahədə də tərəfdaşlıqları mövcuddur. Avropada çox zəngin və siyasiləşən erməni diasoporası Azərbaycana qarşı genişmiqyaslı müharibə aparıb. Erməni diasporasının istəyi Cənubi Qafqazda yenidən müharibələri canlandırmaq, Ermənistanı məqsədləri üçün istifadə etməkdir. Bir sıra Avropa ölkələrinin seçki öncəsi təsir imkanları çox güclüdür. Məsələn, Fransada, Beliçkada, Hollandiyada, Niderlandda onların geniş imkanları var və erməni diasporu bu ölkələrin parlamentlərini Azərbaycana qarşı istifadə etməyə çalışırlar”.
Millət vəkilinin sözlərinə görə, Avropa ölkələri siysətlərində ciddi dəyişikliklər etməlidirlər:
“Avropa ölkləri daha böyük həcmdə Azərbaycan qazı istəyirsə, müvafiq vəsait ayırmalıdır və bu layihələr maliyyələşməlidir. Azərbaycan öz imkanlarından istifadə edərək artıq böyük həcmdə Avropaya çatdırılan qazı artırıb. Lakin Avropa daha çox qaz istəyirsə, onlar bu istiqamətdə müəyyən tədbirlər görməlidirlər. Azərbaycanı Avropada ilk növbədə maraqlandıran təhsil, elm və mədəniyyət sahəsində olan əməkdaşlıqdır. Azərbaycan enerji sahəsində genişmiqyaslı işlər aparır. Azərbaycanın neft və qaz sahəsində əməkdaşlıq etdiyi ölkələr bəllidir və bu istiqamətdə işlərini davam etdirməyə hazırdır”.
Kəmalə Vəliyeva
