Türk Dövlətləri Təşkilatının (TDT) Baş katibi Kubanıçbek Ömüraliyevin rəhbərlik etdiyi nümayəndə heyəti Cenevrədə keçirilən BMT-nin Avropa İqtisadi Komissiyasının (UNECE) Daxili Nəqliyyat Komitəsinin 87-ci sessiyasında iştirak edir.
Bu barədə AZƏRTAC-a TDT-dən bildirilib.
Məlumatda qeyd edilib ki, Türkiyə və Niderlandın birgə ev sahibliyi etdiyi “Dayanıqlı nəqliyyat əlaqələrinin təşviqi” mövzusunda keçirilən nazirlərin dəyirmi masa görüşündə çıxış edən Baş katib Türk regionunda ticarətin asanlaşdırılması və dayanıqlı inkişafın təmin olunmasında nəqliyyatın strateji əhəmiyyətini vurğulayıb. O, TDT çərçivəsində Orta Dəhlizin səmərəliliyini və dayanıqlılığını artıraraq buranın Asiya ilə Avropa arasında əsas ticarət yolu kimi möhkəmləndirilməsi istiqamətində təşəbbüslərə diqqət yönəldib.
Ömüraliyev eyni zamanda rəhbərlik etdiyi təşkilatın rəqəmsallaşma, xüsusilə də eTIR sisteminin tətbiqi ilə bağlı qətiyyətini ifadə edərək, yaxın keçmişdə TDT regionunda eTIR-in tətbiqinə dair Yol Xəritəsinin imzalandığını qeyd edib. O, təşkilatın regional nəqliyyat şəbəkələrinin rəqəmsal transformasiyasını sürətləndirmək məqsədilə UNECE də daxil olmaqla beynəlxalq tərəfdaşlarla əməkdaşlığını gücləndirməklə bağlı qərarlılığını bir daha vurğulayıb.
