Xəbər verdiyimiz kimi bu gün Prezident İlham Əliyev avqustun 28-də Avropa İttifaqının Cənubi Qafqaz üzrə xüsusi nümayəndəsi Maqdalena Qrononu qəbul edib.
Görüşdə ölkəmizin Ermənistanla ikitərəfli əsasda etimad quruculuğu tədbirlərini dəstəklədiyi qeyd olunub.
Azərbaycanın əsas hissəsi ilə onun Naxçıvan regionu arasında maneəsiz nəqliyyat və tranzit bağlantısının yaradılmasının vacibliyi bir daha vurğulanıb, xüsusilə Naxçıvanda nəqliyyat infrastrukturunun yenilənməsi istiqamətində Avropa İttifaqı ilə əməkdaşlıq üçün geniş imkanların olduğu bildirilib.
Nəqliyyat eksperti Elməddin Muradlı “Sherg.az”a bildirdi ki, Cənab Prezidentin nəqliyyat və logistika sahəsinə münasibəti xüsusi əhəmiyyət kəsb edir:
“Bu münasibət yalnız Naxçıvanla məhdudlaşmır, Azərbaycanın bütün bölgələrini əhatə edir. Prezident nəqliyyat və logistika məsələlərinə son dərəcə həssaslıqla və diqqətlə yanaşır, bu sahənin inkişafı ilə bağlı ciddi tapşırıqlar verir, dövlət proqramlarını təsdiqləyir, müxtəlif sərəncamlar imzalayır. Eyni zamanda, bir sıra ölkələrin şirkətlərinin bu sahəyə cəlb olunması istiqamətində təkliflər irəli sürür, danışıqlar aparır və razılıq verir. Naxçıvan isə burada xüsusi strateji önəmə malikdir. Belə ki, uzun illərdir blokada şəraitində yaşayan Naxçıvanın Azərbaycanın digər əraziləri ilə birbaşa nəqliyyat əlaqəsinin təmin edilməsi vacibdir. Cənab Prezidentin illərdir yürütdüyü siyasət məhz bu məqsədə yönəlib. Bundan əlavə, Naxçıvanda nəqliyyat infrastrukturunun yenilənməsi regionun logistik mərkəz kimi formalaşmasına gətirib çıxaracaq. Naxçıvan bu istiqamətdə çox böyük potensiala malikdir. Lakin blokada şəraiti uzun illər onun imkanlarını məhdudlaşdırıb. Zəngəzur dəhlizinin açılması ilə bu istiqamətdə ciddi dəyişikliklərin şahidi olunacaq və Naxçıvanın iqtisadi dirçəlişi təmin ediləcək. Ötən il Naxçıvana səfərim zamanı müşahidə etdim ki, regionun həm nəqliyyat-logistika, həm kənd təsərrüfatı, həm də turizm baxımından geniş potensialı mövcuddur. Sadəcə olaraq, bu imkanlardan istifadə məhdud xarakter daşıyır. Hazırda təyyarə ilə səfərlər o qədər də əlverişli deyil, çünki bəzən biletlərin əldə olunması çətinlik yaradır və hava nəqliyyatı əhali üçün arzuolunan seçim sayılmır. Lakin avtomobil və dəmir yolu nəqliyyatı vasitəsilə regionun iri nəqliyyat-logistika mərkəzinə çevrilməsi mümkündür. Bu transformasiya baş verərkən ilk növbədə nəqliyyat və logistika məsələlərinə prioritet diqqət yetirilməlidir. Cənab Prezidentin siyasəti də məhz Naxçıvanın logistik baxımdan mühüm mərkəzə çevrilməsinə və inkişafına yönəlib”.
