2025-ci ilin yanvar-aprel aylarında Bakı şəhərində ictimai iaşə dövriyyəsinin həcmi 2024-cü ilin müvafiq dövrü ilə müqayisədə real ifadədə 19,3 faiz artaraq 545,3 milyon manat olub.
Bu barədə “APA-Economics” Bakı Şəhər Statistika İdarəsinə istinadən xəbər verir.
Qeyd edilib ki, hüquqi şəxslər tərəfindən ictimai iaşə dövriyyəsi 313,4 milyon manat olub ki, bu da ümumi dövriyyənin 57,5 faizini təşkil edib.
Xatırladaq ki, 2025-ci ilin yanvar-aprel aylarında Azərbaycanda ümumi ictimai iaşə dövriyyəsi 2024-cü ilin müvafiq dövrü ilə müqayisədə real ifadədə 17,7 faiz artaraq 764 milyon manat olub. Beləliklə, hesabat dövründə Bakıda ictimai iaşə dövriyyəsinin həcmi ölkə üzrə ümumi dövriyyənin 71.4%-nə bərabər olub.
Mövzu ilə fikirlərini bölüşən turizm eksperti Cabir Dövlətzadə “Sherg.az”a bildirib ki, 20 faizə yaxın artımın olması müəyyən səbəblərlə əlaqədardır:
“Bu artım sadəcə restoranlarda xidmət deyil. Eyni zamanda çatdırılma xidmətində də ciddi bir inkişaf var. İnsanlar evdə oturduqları halda restoran və kafe xidmətlərindən istifadə edə bilirlər. Çatdırma xidməti bunu ən yüksək səviyyədə yerinə yetirir. Bu da ikitərəfli olaraq həm vaxt qənaətinə, həm də insanların məmnuniyyətinə gətirib çıxarır. Sadəcə, yerli vətəndaşlar deyil, xaricdən gələn turistlər də bu inkişafda əsas rol oynayır. Çünki keçən aylarda gələn turist sayında müəyyən qədər artım olub və bu da kafe, restoran işinin inkişafına müəyyən töhfəsini verib. Bakının mərkəzində olan restoranlar daha çox həm gözəgəlimliyi, həm də rəqabət üstünlüyü ilə seçilirlər. Regionlarda isə restoran və kafelər o qədər də çox deyil. Ona görə də rəqabət zəif olduğu üçün regionlarda qiymətlər bəzən yüksək olur. Bakıda isə restoranların çoxluğu səbəbindən rəqabətə uyğun olaraq qiymətlər daha uyğun halda əldə edilə bilir. Turist axınının bu artımda əsas rolu var”.
