“Çünki bank müqavilələrində, xüsusilə kredit müqavilələrində problemlər var”
“Biz hələ 2014-cü ildə bir alman professoru ilə birlikdə yeni qanun layihəsi hazırlamışdıq. Ancaq banklar qanun layihəsinin qəbul edilməsinə mane oldular”
“Azərbaycanda bank müqavilələri ədalətli tərtib olunmur. Məsuliyyətin böyük əksəriyyəti vətəndaşın öhdəsinə düşür. Bank çox az məsuliyyət daşıyır”.
Bu sözləri iqtisadçı-ekspert Natiq cəfərli bankların fəaliyyəti haqqında danışarkən deyib. O, bankla vətəndaş arasında müqavilələrin formasının yenidən işlənməsini təklif edib.
Məsələyə dair “Sherg.az”a fikrini bildirən bank məsələləri üzrə ekspert Əkrəm Həsənov iqtisadçının sözlərində həqiqət olduğunu deyib:
“Bəli, xüsusilə kredit müqavilələrində problem var. Biz hələ 2014-cü ildə bir alman professoru ilə birlikdə yeni qanun layihəsi hazırlamışdıq. Orada bankların müqaviləyə nəyi daxil etmək hüquqlarının olmadığı göstərilir. Ancaq banklar qanun layihəsinin qəbul edilməsinə mane oldular. Çünki bu, onlara sərf etmir”.
Ə.Həsənovun sözlərinə, yeni qanun layihəsi günün tələbidir:
“Biz qeyri-adi bir qanunla çıxış etmirik. Bu, bütün inkişaf etmiş, Avropa ölkələrində var. Ola bilsin, Afrikada olmasın. Amma axı Azərbaycan Afrika ölkəsi deyil. Deməli, biz gecikirik. Banklar müqavilələrdə məsuliyyət sahibi kimi, demək olar, ancaq vətəndaşı göstərirlər. Sonra da bir problem çıxanda “İstəmirdinsə, qol çəkməzdin” deyir. Bu fikir Qərbdə aqrument kimi artıq qəbul olunmur. Tam əminliklə deyirəm ki, müqavilələrdə vətəndaşların hüquqları pozulur”.
Ekspert düşünür ki, yeni qanun layihəsinin qəbul olunması üçün hər kəs məsuliyyətini başa düşməlidir:
“Dediyim kimi, biz qanun layihəsi hazırlamışıq. Bircə qalır, bunu qəbul etmək. Əslində dövlət orqanları, o cümlədən Maliyyə Nazirliyi, İqtisadiyyat Nazirliyi, Vergilər Nazirliyi bununla razıdırlar. Ancaq banklar assosasiyası məsələyə mənfi münasibət göstərir. Yəqin ki, yekun qərarı Ədliyyə Nazirliyi verməlidir. Həm də deputatlar məsələni gündəmə gətirməlidirlər. Parlamentdə Əli Məsimli ilə Vahid Əhmədovdan başqa heç kim bu haqda danışmır. Vətəndaşlar da fəal olmalı, haqqlarını tələb etməlidirlər. Ancaq bu yolla nəyəsə nail olmaq mümkündür”.
