2025-ci ilin yanvar-mart aylarında Bakı şəhərində əhaliyə göstərilən ödənişli xidmətlərin dəyəri 2024-cü ilin müvafiq dövrü ilə müqayisədə real ifadədə 11% artaraq 2 milyard 134,5 milyon manat təşkil edib.
Bu barədə Bakı şəhər Statistika İdarəsi xəbər verib.
Qeyd edilib ki, hüquqi şəxslər tərəfindən əhaliyə 1 milyard 778,8 milyon manatlıq xidmət göstərilmişdir ki, bu da xidmətlərin ümumi dəyərinin 83,3 faizinə bərabər olub.
Məsələ ilə bağlı "Sherg.az"a danışan iqtisadçı ekspert Xalid Kərimli bildirib ki, bu artımın əsas səbəblərindən biri də nəqliyyat tariflərinin yüksəldilməsidir:
“2023-cü ilin iyul ayından etibarən metro və avtobuslarda gediş haqları artırıldı ki, bu da birbaşa olaraq əhalinin gündəlik xərclərinə təsir etdi. Eyni zamanda, dizel yanacağı və benzinin qiymətinin artırılması da xidmət sahələrindəki qiymət artımını şərtləndirən mühüm amillərdəndir. Xüsusilə logistika və daşımaya əsaslanan xidmətlərdə bu artım özünü daha qabarıq şəkildə göstərir. Beləliklə, nəqliyyat və enerji xərclərindəki artım demək olar ki, bütün xidmət növlərində qiymətlərin yüksəlməsinə gətirib çıxardı. Bu artımlar xidmət sektorunun keyfiyyət baxımından ciddi şəkildə inkişaf etməsi ilə bağlı deyil. Dövlət Tarif Şurasının qəbul etdiyi qərarlarla yanaşı, ölkədə müşahidə olunan inflyasiya da bu prosesin daha da sürətlənməsinə səbəb olub. Nəticədə, xidmət sahəsində fəaliyyət göstərən sahibkarlar da öz xərclərini kompensasiya etmək üçün qiymətlərini artırmağa məcbur olurlar”.
