Rusiya təkcə pul itirməyəcək, həm də qaz itirəcək
"Rusiya ən ciddi səhvlərindən birini etdi. Avropaya qaz ixracını saxlamaqla özünə daha çox zərbə vurmuş oldu". Bu barədə iqtisadçı Eldəniz Əmirov deyib. Ekspert bildirib ki, qaz ən təhlükəsiz və ən davamlı valyuta mənbəyi idi: "Hər yerdən əli üzülən Rusiya əsas valyutanı burdan alırdı. Amma iş orasındadır ki, indi Rusiya təkcə pul itirməyəcək, həm də qaz itirəcək. Çünki qaz yataqlarını su krantı kimi bağlamaq olmur.
Qaz çıxan bəzi quyuların bağlanılması ümumiyyətlə mümkün deyil. Bəzilərini isə bağlamaq çox təhlükəlidir, böyük faciələr baş verə bilər. Bəzi az təzyiqli quyuları isə bir təhər bağlamaq olsa da, sonradan bu quyuları işə salmaq üçün küllü miqdarda vəsait tələb olunur. Buna görə də Rusiya Avropaya ixrac etdiyi 200 milyard kub metr qazın böyük bir hissəsini indi havaya uçurdub yandırmaq məcburiyyətində qalacaq. Bu qazın hansı həcmdə olduğunu aydın göstərmək üçün deyim ki, Azərbaycanın bir ildə istifadə etdiyi qazın həcmi cəmi 12 mlrd. kub metrdir. İndi təsəvvür edin, Rusiya nə qədər qazı havaya yandırıb uçurtmalı olacaq".
İqtisadçı vurğulayıb ki, ən acınacaqlı hallardan biri də odur ki, Rusiyanın 1/3 hissəsi qazsızdır: "Amma yenə qaz havaya uçurdulacaq. Ona görə ki, havaya yandırıb uçurduqları qazı Rusiyanın qazsız ərazilərinə vermək üçün heç infrastruktur da mövcud deyil. Görünən odur ki, Rusiyanın bir-birini əvəzləyən yanlış strateji qərarları onu daha da çıxılmaz vəziyyətə salır".
