Rusiya ilə münasibətlərin normallaşması halında qiymətlərin sabitləşəcəyi, əks halda isə artım tendensiyasının davam edə biləcəyi ehtimal olunur
Azərbaycanda unun topdansatış qiymətləri açıqlanıb
Bu barədə Prezident yanında Antiinhisar və İstehlak Bazarlarına Nəzarət Dövlət Agentliyi məlumat yayıb.
Bildirilib ki, bu ayın 21-nə Azərbaycandakı un istehsalçılarının topdansatış məntəqələrində 50 kq-lıq un kisəsinin satış qiyməti 25.8-28 manat təşkil edib.
Həmçinin, Bakı şəhərində və Abşeron rayonunda 26.5-27.3 manat civarında dəyişib.
İqtisadçı Razi Abbasbəyli “Sherg.az”a bildirdi ki, ilin bu dövründə qiymət dinamikasının dəyişməsi gözləniləndir:
“Əvvəlki illərin statistikası bu tendensiyanı təsdiqləyir. Yerli tədarük prosesinin hələ tam başa çatmaması, ərzaqlıq buğdanın ehtiyat anbarlara toplanması ilə bağlı məlumatların qeyri-müəyyənliyi və bazarda qeyri-bərabər rəqabət mühiti qiymətlərin formalaşmasına təsir göstərir. Dövlət, unun strateji məhsul olması səbəbindən, qiymətlərin sabitliyini təmin etmək məqsədilə mütəmadi monitorinqlər və güzəşt mexanizmləri tətbiq edir. Lakin psixoloji faktorların rolu da nəzərəçarpacaqdır. Azərbaycan illik ərzaqlıq buğda tələbatının 70%-dən çoxunu Rusiyadan idxal edir. Son dövrlərdə iki ölkə arasındakı münasibətlərdəki gərginlik və idxal prosesindəki qeyri-müəyyənlik bazarda psixoloji təzyiq yaradır. Əgər Rusiya ilə münasibətlər normallaşmasa və ərzaq buğdasının idxalı ilə bağlı asılılıq davam edərsə, Rusiya bu imkandan Azərbaycanın əleyhinə istifadə etməyə çalışacaq. Rusiya ilə münasibətlərin normallaşması halında qiymətlərin sabitləşəcəyi, əks halda isə artım tendensiyasının davam edə biləcəyi ehtimal olunur”.
