Bildiyimiz kimi Rusiya Prezidenti Vladimir Putin ötən gün Moskvada keçirilən MDB Dövlət Başçıları Şurasının məhdud tərkibdə iclasında deyib ki, Azərbaycanın Laçın şəhəri 2025-ci ildə MDB-nin mədəniyyət paytaxtı olacaq. Bununla bağlı Prezident İlham Əliyev Moskvada keçirilən MDB Dövlət Başçıları Şurasının məhdud tərkibdə iclasında çıxışında söyləyib ki, Laçının MDB-nin mədəniyyət paytaxtı elan edilməsi həm laçınlılar, həm də bütün Azərbaycan xalqı tərəfindən böyük minnətdarlıqla qarşılanıb. Cənap Prezident qeyd edib ki, MDB Humanitar Əməkdaşlıq Şurasının qərarına əsasən, Azərbaycanın Şərqi Zəngəzur rayonunun Laçın şəhəri 2025-ci ildə MDB-nin mədəniyyət mərkəzi elan edilib. Laçın 30 ilə yaxın müddətdə Ermənistanın işğalı altında olmuş Azərbaycan şəhərlərindən biridir və demək olar ki, tamamilə dağıdılıb. Bu gün Laçın artıq bərpa olunub. Burada yeni həyat başlayıb, keçmiş məcburi köçkünlər qayıdıblar.
Əslən Laçından olan, yazıçı Şərif Ağayar “Sherg.az”a söyləyib ki, Laçın Şəhərinin MDB ölkələrinin mədəniyyət paxtaxtı seçilməsi böyük hadisədir:
“Mən həmişə Azərbaycanın ərazi bütövlüyü təmin olunduqdan sonra işğaldan azad edilən ərazilərdən bütün dünyaya sülh və mədəniyyət mesajları verməyimizi arzulamışam. Bununla biz Postsovet məkanında olan ölkələrə göstəririk ki, torpaqlarımıza müharibə, dava və kiminsə evini dağıtmaq üçün qayıtmamışıq. Zəngəzur torpaqları Üzeyir Hacıbəyli, Xosrov, Sarı Aşıq kimi böyük şəxsiyyətlər yetişdirib. Azərbaycan həmin ərazilərdə öz mədəniyyətini dirçəldəcək və tarixi abidələrimizi dünyaya tanıdacağıq. Ümumiyyətlə Azərbaycanın niyyəti sülh, əmin-amanlıq və mədəniyyətdir. Mədəniyyət olan yerdə qan və silah olmur. Laçının belə bir status qazanması da bu mənada çox sevindiricidir. Doğulduğum şəhərin genişmiqyaslı mədəniyyət paytaxtı seçilməsi mənim üçün qürür mənbəyidir. Eyni zamanda bu yolda əlimdən gələn heç nəyi əsirgəmərəm. Yəni qələm sahibi olaraq tədbirlərin keçirilməsində, işıqlandırılmasında, təbliğində yaxından iştirak etməyə hazıram. İndiyə qədər “Hoçazfilm” studiyasında Xosrov bəy haqqında sənədli filmin ssenarisini hazırlamışıq. Qayıdışla bağlı tammetrajlı filmlə bağlı böyük layihəmiz də Mədəniyyət Nazirliyində qalib olub. Təəssüflər olsun ki, həmin filmin çəkilişləri müəyyən səbəblərə görə yubanır. Amma Laçının belə paytaxt seçilməsi yarımçıq qalan prosesləri sürətləndirəcək. Laçının MDB-nin mənədiyyət paytaxtı seçilməsi münasibətiylə laçınlıları və bütün Azərbaycan xalqını təbrik edirəm. Arzu edirəm ki, Laçın gələcəkdə bütün dünyanın mədəniyyət paytaxtı seçilsin”.
