"Türk dünyasına qarşı olan iftiralara qarşı birgə mübarizə aparmalıyıq".
"Report"un yerli bürosunun xəbərinə görə, bunu Türkiyənin Prezident Adminstrasiyasının Kommunikasiya İdarəsinin rəhbəri Fəxrəddin Altun Bursa şəhərində "Türk dünyası yeni nəsil media fəaliyyətləri" ilə bağlı keçirilən forumda videoformatda çıxışı zamanı deyib.
"Yeni elektron media və informasiya texnologiyaları əlaqələrimizi sürətləndirməklə yanaşı, həm də dezinformasiya və qaralama kampaniyalarını da ortaya çıxardı. Bundan da daha çox əziyyət çəkən türk dünyası oldu", - F.Altun vurğulayıb.
Bu təhdidlərlə mübarizə aparmaq üçün türk dünyasının ortaq fəaliyyətlərinin genişləndirilməsinin vacibliyini vurğulayan Fəxrəddin Altun deyib ki, bu məqsədlə bu ilin may ayında İstanbulda Türk Dövlətləri Təşkilatlarının (TDT) media fəaliyyətlərinə məsul olan nazir və müvafiq media rəhbərlərinin toplantısı da bu məqsədə xidmət edib və bugünkü tədbir də belə mübarizə tədbirlərinin silsilə davamıdır.
F.Altun bu istiqamətdə türk dünyasının birgə fəaliyyətləri, təcrübələri bölüşməklə qarşıdakı maneələrin dəf olunacağına inandığını bildirib:
"Bu çərçivədə türk dünyası yeni nəsil media forumunu çox dəyərləndirirəm. Prezidentimiz Rəcəb Tayyib Ərdoğanın vurğuladığı kimi, eyni məqsədlər üçün daha sıx və bir çətir altında birləşməliyik, türk dövlətləri ilə müştərək hərəkət edərək ortaq platformalar qurmalıyıq. Biz də qlobal dezinformasiyaya qarşı Türkiyə olaraq türk dünyasına tam dəstək verməyə hazırıq. Bu sahədə güc birliyimizi birləşdirməliyik, regionda və dünyada fəaliyyətlərimizi ən üst səviyyəyə daşımaqla daha adil, ədalətli dünyanın yaranmasına dəstək verməliyik. Bu əsrin türk dünyası əsri olduğu üçün aramızdakı əlaqələrimizi daha da gücləndirməliyik".
Qeyd edək ki, "Türk dünyası yeni nəsil media fəaliyyətləri" panelində Azərbaycanı İctimai Televiziyanın Türkiyə Bürosunun rəhbəri Ramin Hüseynov təmsil edib.
Tədbirdə Türkiyənin “Star” qəzetinin yazarı Sevil Nuriyeva da iştirak edib. Tədbir iki gün davam edəcək.
