Hazırda Azərbaycanda 910 nəfər orqan transplantasiyası (böyrək, qaraciyər, sümük iliyi və buynuz qişasının transplantasiyası) üçün növbədədir.
Bu barədə "Report"un sorğusuna cavab olaraq Səhiyyə Nazirliyi Orqan Donorluğu və Koordinasiya Mərkəzindən bildirilib.
Məlumata əsasən, onlardan 298-i böyrək, 123-ü qaraciyər, 464-ü sümük iliyi, 25 nəfəri isə buynuz qişa transplantasiyası üçün növbə gözləyir.
"Böyrək transplantasiyası üçün növbə gözləyənlərdən 18-i uşaq, 280 nəfəri böyükdür. Bununla yanaşı, qaraciyər transplantasiyası üçün 5 uşaq, 118 böyük, sümük iliyi transplantasiyası üçün 371 uşaq, 93 böyük, buynuz qişa transplantasiyası üçün isə 2 uşaq, 23 böyük hazırda növbə gözləyir", - məlumatda qeyd olunub.
Professor Adil Qeybulla “Sherg.az”a bildirib ki, Azərbaycanda donorluq haqqında qanun layihəsi müzakirə edilsə də, hələlik bununla bağlı real infrastruktur yaradılmayıb:
“İlk növbədə, elə bir sistem qurulmalıdır ki, həm növbəyə duranların, həm də əldə edilən donorların siyahası olsun. Donor dünyanın hər yerində beyin ölümü keçirən insanlardan seçilir. Yəni həyatını itirən şəxslərdən orqanlar götürülür və növbədə duran insanlara köçürülür. Azərbaycanda isə bu sistem qurulmadığına görə, donor gözləyənlərin sayı çoxdur. Bu sayın, yəni 910 nəfərin hamısını orqan transplantasiyası ilə təmin etmək mümkün olmayacaq. Ona görə də, bəzi insanlar ölkədən kənara getməyə məcburdur. Heç kim beyin ölümü keçirmiş şəxsi yarmağa icazə vermir. İnsanlar buna hazır olmalıdır ki, onlardan orqan götürülə bilsin”.
Kəmalə Vəliyeva
