Prezident İlham Əliyev Milli Məclisdə çıxışında Azərbaycana qarşı xarici dairələrin yeni planlar hazırladığını vurğuladı. Həmçinin Ermənistanın silahlandırılmasını, buna görə sərhəddə ciddi tədbirlər görüldüyünü qeyd etdi. Dövlət başçısı Azərbaycan ətrafında xeyli çətinliklərin olduğunu rəsmən elan etmiş oldu: “Biz heç vaxt heç kimə qarşı heç bir iş görməmişdik, heç kimin işinə qarışmamışdıq. Amma bizim işimizə qarışmaq istəyənlərə də hər dəfə dərs vermişik ki, bunu etməsinlər. Belə cəhdlər olub və olacaq". Prezident deyib ki, onların heç bir əhəmiyyəti yoxdur, ancaq bizim xarici siyasət istiqamətində bu amil təbii olaraq həmişə nəzərə alınacaq: "Bizimlə ikitərəfli formatda qarşılıqlı hörmət əsasında kim əməkdaşlıq etmək istəyirsə, biz ikiqat əməkdaşlıq edəcəyik. Amma əgər kimsə hesab edir ki, bizə gəlib nəsə diktə edəcək, yaxud da bizi əsassız olaraq ittiham edəcək, ya da hansısa vasitələrlə bizi qaralayacaq və sanki heç nə olmamış kimi bu ölkələrlə biz dostluq edəcəyik, bu, səhv təsəvvürdür, bu, olmayacaq”.
Politoloq Məhəmməd Əsədullazadə "Sherg.az"a deyib ki, Zəngəzur dəhlizi və Ermənistanla sülh müqaviləsi məsələsində Qərb, Rusiya və İranın ziddiyyətli siyasəti, Fransanın Ermənistan üzərindən Türkiyə Azərbaycan tandeminin qarşısını almaq üçün planlar hazırlanır. Ekspert bildirib ki, Ermənistanla Azərbaycan arasında sülhün qarşısını almaq məqsədi ilə Rusiya, Fransa və İran prosesi pozmağa çalışır:
"Azərbaycan Pakistandan JF17 çoxfunksiyalı və yeni nəsil qırıcılar alıb. Bir milyard dollarlıq qırıcıların alınması Azərbaycanın hərbi hava qüvvələrini kifayət qədər gücləndirəcək. Ermənistanın Hindistan artilleriya və digər zirehli texnikalar tədarükü etməklə Azərbaycanın da öz hərbi qüvvələrini yeniləməyi və inkişaf etdirməyi zərurəti yaranır. Silahlanma yarışına Ermənistan başladı və tez bir zamanda çalışır ki, silahlı qüvvələrini yeni texnikalarla təchiz etsin. Bununla da Azərbaycanla danışıqlarda yeni şərtlərlə çıxış etsin. Azərbaycan yeni nəsil qırıcılar almaqla Ermənistanı pat vəziyyətdə qoydu. Azərbaycan bundan sonra da Ermənistan və onun hamilərini təəccübləndirməyə davam edəcək. Çünki Azərbaycana qarşı kirli oyunlar davam edir".
