May ayı ərzində Kliniki Tibbi Mərkəzin Toksikologiya şöbəsinə zəhərlənmə səbəbi ilə 103 nəfər qəbul edilib. KTM-nin məlumatına görə, şöbəyə qəbul edilən xəstələrdən 38 nəfər dərmandan, 30 nəfər sirkə turşusundan, 2-si spirtli içkidən, 8-i ilan sancmasından zəhərlənən şəxslərdir. Həmçinin onlardan 1 nəfər dəm qazından, 14 nəfər allergik reaksiyadan, 4 nəfər botulizmdən, 2 nəfər fosfor üzvi birləşmələrdən, 4 nəfər yabanı bitkilərdən zəhərlənmə səbəbi ilə şöbəyə yerləşdirilib. Həkimlərin səylərinə baxmayaraq, zəhərlənən şəxslərdən 4 nəfər (3 kişi cinsli, 1 qadın cinsli) dünyasını dəyişib. Ölüm halları sirkə turşusu və dərman zəhərlənmələrindən qeydə alınıb.
Statistikaya nəzər salan professor Adil Qeybulla “Sherg.az”a açıqlamasında bildirib ki, son illər açıqlanan rəqəmlər göstərir ki, xüsusilə dərman və sirkə turşusu ilə zəhərlənmə halları üstünlük təşkil edir. Onun sözlərinə görə, bu zəhərlənmələrin əksəriyyətinin qəsdən və ya təsadüfən baş verən intoksikasiyalarla əlaqəli olduğunu göstərir:
“Əvvəla qeyd edim ki, zəhərlənmə qidaların düzgün saxlanılmaması və istifadə olunmamasından, konservləşdirmə prosesinin qaydalara uyğun aparılmamasından baş verir. İnsanlar çox vaxt konservləşdirilmiş qidalardan zəhərlənir. Burada əsasən, ev şəraitində hazırlanmış qidalardan söhbət gedir. Ev şəraitində hazırlanmış yeməklər, şorabalar əgər öz rəngini, möhtəviyyatını dəyişibsə, suyu bulanıbsa, köpüklənibsə, qapağı şişibsə, bu o deməkdir ki, orada müəyyən dəyişikliklər baş verib və artıq ondan qida üçün istifadə etmək olmaz. Təəssüflər olsun ki, bu cür qidalardan istifadə olunur və ailəlikcə zəhərlənmə halları qeydə alınır. Balıq məhsullarından istifadə zamanı əgər onlar düzgün saxlanılmayıbsa, zəhərlənmə halları ola bilər. Göbələklərdən, balıqdan, şorabalardan, boyat qidalardan istifadə edərkən diqqətli olmaq lazımdır. İnsanlar bu məsələlərə həssas yanaşsa, zəhərlənmə hallarının da sayı azalar”.
Dərmandan zəhərlənmə hallarına gəlincə, A.Qeybulla qeyd edib ki, xəstə müalicə məqsədilə dərman qəbul edib və zəhərlənibsə, bu, dərman vasitəsinin yan təsirindən qaynaqlanır. Dərmandan zəhərlənmə halı varsa, bu, mütləq şəkildə araşdırılmalıdır:
“Əhali arasında məişətdə istifadə olunan kimyəvi maddələrin təhlükələri barədə maarifləndirmə işləri gücləndirilməlidir.
Dərmanların, xüsusilə psixotrop və toksik təsirli preparatların nəzarətsiz istifadəsinin qarşısı alınmalı, ev şəraitində qorunması üçün təhlükəsizlik tədbirləri artırılmalıdır”.
Professor sirkə turşusundan zəhərlənmələrin adətən özünə qəsd xarakteri daşıdığını bildirib:
“Bəzi hallarda isə insanlar bilmədən qatı sirkə turşusu qəbul edirlər və nəticədə zəhərlənmə, bəzən də ölüm hadisəsi baş verir. Bu, sirkə turşusunun istifadəsi ilə bağlı ciddi təhlükələri göstərir. Sirkə turşusu ilə zəhərlənmələrdə orqanizmin müxtəlif sistemlərinə ciddi təsirlər müşahidə olunur. Bu səbəbdən, sirkə turşusu kimi təhlükəli maddələrin evdə təhlükəsiz şəkildə saxlanılması və uşaqların əli çatmayan yerlərdə yerləşdirilməsi vacibdir. Sirkə turşusunun soyuducunun aşağı gözündə saxlanılması uşaqlar üçün təhlükə yarada bilər, çünki onlar bu məhlulu su zənn edərək içə bilərlər.
