İspaniyada aparılan bir araşdırma, althseymer xəstəliyinin ilkin mərhələdə qan analizi ilə müəyyən edilə biləcəyini ortaya qoyub. Yeni üsul diaqnostik xərcləri əhəmiyyətli dərəcədə azalda bilər.
“Sherg.az” “NTV.com.tr”yə istinadən bildirir ki, "Hospital del Mar" Araşdırma İnstitutunun və Barselona Beta Beyin Araşdırma Mərkəzinin tədqiqatçıları altsheymer riskini təyin etmək üçün istifadə edilən “phospho-tau217” biomarkerinin hətta xəstəliyin ilkin mərhələlərində də təsirli olduğunu göstəriblər. Tədqiqat İsveçdə dörd xəstəxana əsaslı qrup və ilkin tibbi yardım qrupu üzrə 1767 nəfərin məlumatlarını təhlil edib. Tədqiqatçılar bu biomarkerin althseymerin idrak pozğunluğunun əlamətlərini göstərən fərdlərdə dəqiq olduğunu tapdılar. Test xüsusilə xəstəliyin ilkin mərhələlərində yüksək dəqiq nəticələr verir və əlavə və daha bahalı testlərə ehtiyac olub-olmadığını müəyyən etməyə kömək edir. "Hospital del Mar" və "Barcelona Beta Brain Research Center"də olan Dr. Marc Suarez-Calvet, araşdırma ilə bağlı verdiyi açıqlamada, "Bu inkişaf bizə əlavə testlərə ehtiyacı olanları müəyyən etməyə kömək edə bilər, çünki bu, altsheymer xəstəliyinin hətta erkən mərhələlərində də böyük dəqiqliklə aşkarlanmasına imkan verir", deyib. Calvet, “P-tau217” biomarkerinin səviyyələrinin iki fərqli həddi müəyyən etdiyini və bu səviyyələr arasında qalan insanların əlavə testlərə ehtiyacı olduğunu və biomarker nəticələrinin həmişə bir mütəxəssis səhiyyə işçisi tərəfindən qiymətləndirilməsi lazım olduğunu vurğulayıb. Tədqiqatlar göstərib ki, bu test altsheymerin diaqnozunda xərcləri azalda bilər, mövcud üsullarla müqayisədə 60-81 faiz arasında qənaət edə bilər. Bununla belə, testin klinik tətbiqlərdə tam istifadə edilməsi üçün daha çox araşdırmaya ehtiyac olduğu bildirilir.
