Yeni araşdırma göstərib ki, oxuma, yazma və xüsusilə yeni xarici dil öyrənmək kimi zehni stimullaşdırıcı fəaliyyətlər demensiya riskini azalda bilər.
Sherg.az xəbər verir ki, “Neurology” jurnalında dərc olunan təhlilə əsasən, zehni fəallığı artıran amillər demensiya riskini təxminən 38–40 faiz azaldır.
Tədqiqat Çikaqodakı Rush Universiteti Tibb Mərkəzinin alimləri tərəfindən aparılıb. Araşdırmada başlanğıcda demensiya diaqnozu olmayan, orta yaşı 80 olan 1939 nəfər 8 il ərzində izlənilib.
Nəticələr göstərib ki, həyat boyu zehni baxımdan daha aktiv olan şəxslərdə Alzheimer xəstəliyi həm daha az müşahidə olunur, həm də daha gec yaşda ortaya çıxır.
Koqnitiv zənginləşmə səviyyəsi ən yüksək olan qrupda Alzheimerin yayılma göstəricisi 21 faiz olduğu halda, ən aşağı səviyyəli qrupda bu göstərici 34 faiz təşkil edib. Bundan əlavə, zehni cəhətdən daha aktiv insanlarda xəstəliyin başlanmasının orta hesabla 5 il gecikdiyi bildirilib.
Əvvəlki tədqiqatlar da göstərir ki, dil öyrənmək beyində boz maddənin həcminin artmasına kömək edə bilər. Boz maddə öyrənmə, hərəkət, emosiyalar və yaddaşla əlaqəli beyin toxuması hesab olunur.
