Bu xəstəliyin koronavirus qədər geniş vüsət alacağı gözlənilmir
Azərbaycan Dövlət Tibb Universitetinin professoru, tanınmış həkim-cərrah Adil Qeybulla "ARB24"də yayımlanan "Nə baş verir?" verilişində qonaq olub. Professor çıxışı zamanı meymun çiçəyi virusun aprel ayının sonlarında Böyük Britaniyada aşkarlandığını bildirib:
"Nigeriyadan qayıdan şəxsdə meymun çiçəyi virusuna rast gəlinib. Virus ilk dəfə xərçəngkimilərlə qidalanan makaka meymunlarında tapılıb. Hazırda yeni bir pandemiya baş verərsə, 1980-ci ildən sonra doğulan şəxslər müdafiəsiz olacaqlar. Meymun çiçəyi virusu ilk dəfə 1958-ci ildə Danimarkanın paytaxtı Kopenhagen şəhərində identifikasiya olunub. Daha sonra ayrı-ayrı yerlərdə ocaqlar baş verib.
Ekspert vurğulayıb ki, peyvənd resursu olmalıdır:
"İndiki şirkətlər malekulyar biologiyanı ən müasir üsullarıyla imitasion peyvəndlər ala bilirlər. Odur ki, tez bir müddətdə peyvəndlər istehsal oluna bilər".
İnfeksionist-hepatoloq Mərdan Əliyev isə "Şərq"ə açıqlamasında bildirib ki, meymun çiçəyi virusunun tarixinin daha qədimlərə getdiyini bilirik:
"Xəstəliyə qarşı peyvənd mövcuddur. Təbii çiçək virusuna qarşı vaksin 1980-ci ilə qədər istifadə olunub və meymun çiçəyinə də effektilidir. Ona görə də vaksindən istənilən vaxt yararlanmaq olar. Yəni koronavirus kimi sözügedən virusun da vaksininin hazırlanmasını gözləməyə 1 il-il yarım vaxta ehtiyac olmayacaq. Digər tərəfdən bu xəstəlik COVİD-19 qədər sürətlə yayıla bilməz. Çünki onun yoluxma qabiliyyəti zəifdir. Lakin sıx kontakt və tənəffüs yolları ilə xəstəlik başqasına keçə bilər. Koronavirusda isə qısa müddət ərzində yoluxma baş verirdi. COVİD-19-dan fərqli olaraq, bu xəstəlik assimtomatik formada irəliləmir.
Çünki koronavirusun əlamətlərini zahirən görə bilmirdik. Meymun çiçəyinin isə səpkilər, qızdırma, halsızlıq kimi şikayətləri mütləq olur.
Belə olan halda da ətrafdakı şəxslər də xəstəni sağlamdan ayırd edib, özünü qoruya, yaxud da virusa yoluxmuş insan özünü təcrid edə bilər.
Bütün bunları nəzərə alsaq, meymun çiçəyi xəstəliyinin koronavirus qədər geniş vüsət alacağı gözlənilən deyil.
Bu xəstəlikdən qorunmaq üçün 1980-ci ildən sonra doğulan şəxslər təbii ki, istənilən vaxt peyvənd oluna bilər. Amma pandemiyanın elan olunması ehtimalı çox azdır. Çünki bu xəstəlik müəyyən yerlərdə hər il ortaya çıxır, lakin pandemiyaya səbəb olmur".
