İslam Əməkdaşlıq Təşkilatına üzv ölkələrdə işsizlik səviyyəsi son 12 ildə yaxşılaşmayıb, nisbətən pisləşib.
Bu barədə əmək və əhalinin sosial müdafiəsi naziri Sahil Babayev İslam Əməkdaşlıq Təşkilatına (İƏT) üzv dövlətlərin əmək nazirlərinin 5-ci konfransının Nazirlər Sessiyasında çıxışında deyib.
“Hələ də işsizliklə bağlı çağırışlarımız gündəmdədir. Bu gün bizim ölkələrdə əhalinin orta artım tempi artıqdır. Gənc əhalinin sayı çoxdur. Xüsusilə gənclər arasında işsizlik 15,8 faizdir. Bu da qarşıdakı dövrlərdə qarşımızda olan növbəti çağırışlardan biridir”,- deyə nazir bildirib.
O, həmçinin, əlavə edib ki, İƏT dövlətləri arasında əməkdaşlığı artırmaqla ölkələrimizdə inkişafa töhfə verə bilərik.
Qeyd edək ki, İslam Əməkdaşlıq Təşkilatına (İƏT) üzv dövlətlərin əmək nazirlərinin Bakıda keçirilən 5-ci konfransının Nazirlər Sessiyası keçirilir.
Məsələ ilə bağlı "Sherg.az"a danışan sosioloq Əhməd Qəşəmoğlu bildirib ki, İşsizliyin faiz göstəricisinin pik həddə çatmasının əsas səbəbi ölkədə iqtisadçıların fəaliyyətidir:
"Hələ 1994-cü ildə mühüm elmi mərkəzin rəhbəri olaraq təkliflər planı hazırladım. Burada işsizliyin və yoxsulluğun aşağı səviyyəyə çatdırılması üçün nə etməli olduğumuz göstərilmişdi. Bu planı indiki dövrdə də həyata keçirməyə böyük ehtiyyac var. Bəzi məmurlar buna əhəmiyyət vermirlər. Kəntlərdə xeyli torpaq sahəsi və onları hərəkətə gətirmək üçün mexanizmlər mövcuddur. Bunun üçün əhaliyə aşağı faizlə kredit vermək lazımdır. Həmçinin texnika və gübrə ilə təmin edilməsinə köməy edən strukturlar yaradılmalıdır. Məhsul verən zaman tədarük şəbəkəsi satın alıb, Bakıya daşınmalıdır. Kənd əhalisi məhsul istehsalı ilə məşğul olmalıdır.Paytaxtdakı sakinlərin demək olar ki, yarısı rayona qayıdacaq. Bu zaman is yerləri xeyli artacaq. Çox təəssüf ki, bu plan həyata keçirilmir, bu istiqamətdə tədbirlərə əhəmiyyət verilmir. İqtisadçıların və bu məsələlərə cavabdeh olan şəxslərin günahı var".
