ABŞ Prezidenti Donald Trampın “ən pis” portretini çəkən britaniyalı rəssam Sara A. Bordmanın sözlərinə görə, bu portret onun karyerasını təhlükə altına salıb.
Bordman 2019-cu ildə ABŞ-ın Kolorado ştatının paytaxtı Denverdə yerləşən ştat parlamenti binası üçün Trampın rəsmi portretini hazırlayıb və bu portret altı il ərzində binada asılıb.
Lakin Tramp ötən ay sosial media hesabında paylaşdığı açıqlamada portretin üzərində qəsdən dəyişiklik edildiyini iddia edib. O, rəssamın sabiq prezident Barak Obama üçün hazırladığı portreti “mükəmməl” adlandırsa da, öz portretini “həqiqətən ən pis” kimi dəyərləndirib.
Sara A. Bordman bu açıqlamalardan sonra ilk dəfə danışaraq niyyətinin, dürüstlüyünün və peşəkarlığının şübhə altına alındığını bildirib. O, Trampın tənqidlərini rədd edib və portreti tam dürüstlük və peşəkar yanaşma ilə işlədiyini, əsərdə qəsdən hər hansı bir təhrif, siyasi mövqe və ya karikatura üslubu olmadığını vurğulayıb.
"CNN International"ın xəbərinə görə, rəssam Trampın rəyə sahib olmaq hüququnu qəbul etdiyini, lakin “qəsdən pis çəkilib” kimi ittihamların və “yaşlandıqca qabiliyyətini itirib” tənqidlərinin onun 41 illik sənət karyerasına mənfi təsir etdiyini deyib.
Bordman həmçinin qeyd edib ki, bu vəziyyət onun karyerasının bərpası ilə bağlı narahatlıqlar yaratmağa başlayıb.
