Azər Qasımov: "Çıxılmaz vəziyyətdə qalan Paşinyan xarici havadarlarına "bizi sülhə məcbur etməyin və buna mane olun" mesajını vermək istəyir"
Demarkasiya və delimitasiya prosesi ilə bağlı təhdidlər var. Belə bir iddia ilə Ermənistan Baş naziri Nikol Paşinyan Vladivostokdakı erməni icması ilə görüşündə çıxış edib. O bildirib ki, Azərbaycan beynəlxalq meydanlarda Ermənistana qarşı hər hansı ərazi iddiasının olmadığını deyir: “Ancaq onlar “Şərqi Zəngəzur” terminindən istifadə edirlər, bu isə “Qərbi Zəngəzur”un mövcudluğu deməkdir.
Bütün bunlarda gizli məna var”. Paşinyan qeyd edib ki, hansı xəritələrlə sərhədin müəyyən edilməsi ilə bağlı müxtəlif fikirlər var: “Deyirlər, 1921, 1923, 1975 və ya 1969-cu il xəritələri əsas götürülməlidir. Biz deyirik, demarkasiya və delimitasiya hüquqi qüvvədə olan sənədlər vasitəsilə həyata keçirilməlidir. Azərbaycanda belə bir bəyanatlar səsləndirilir ki, hansısa ildəki xəritə təsdiqləyir ki, Zəngəzur Ermənistana qanunsuz olaraq verilib və yaxud hansısa yaşayış məntəqəsi qanunsuz olaraq Ermənistana verilib". Baş nazirin fikrincə, bu, destruktiv yanaşmadır və Azərbaycanın ambisiyasını, daxili təhdidi göstərir: "Biz irəli getməliyik və demarkasiya, delimitasiya məsələsinin həllinə nail olmalıyıq, o cümlədən Qarabağ məsələsinin həllini tapmalıyıq”.
Ermənistan baş nazirinin açıqlamasını "Şərq"ə təhlil edən politoloq Azər Qasımov deyib ki, Azərbaycanın tarixi torpaqlarının adını tez-tez çəkməsini və onların geri verilməsini istəməsində qeyri-adilik yoxdur. Ekspert bildirib ki, sovet ittifaqı qurulanda Azərbaycanın fikri soruşulmadan və razılığı olmadan bu torpaqlar Ermənistana verilib:
"Necə verilibsə, eləcə də geri qaytarılmalıdır. Ermənistan qəbul etsə də, etməsə də reallıq budur. Hüquqi qüvvədə olan və BMT tərəfindən qəbul edilən sənədlərdə SSRİ-nin ərazisi əsas sənəd kimi qəbul edilib. İttifaq daxilində olan respublikaların sərhədləri əsas kimi götürülməyib. Bu durumda BMT bir-birinin sərhədini tanımayan iki dövlətin müəyyənləşməmiş sərhədi barəsində heç bir hüquqi fikir yürüdə bilməz. Ermənistan "özünün hesab etdiyi" Azərbaycan ərazilərini işğal edəndə beynəlxalq hüquq yada düşmürdü. İndi Azərbaycan öz halal torpaqlarını istəyəndə beynəlxalq hüquqdan danışır".
Analitikə görə, Paşinyanın bu barədə danışması bizim xeyrimizədir: "Bizim açıq demədiyimizi Paşinyan bütün dünyaya reklam edir və dünya ictimaiyyətində fikir formalaşdırır. Baş nazir rəsmi Bakının şərtləri əsasında gündəmə gətirilən sülh məsələsinin Ermənistan üçün əlverişsiz olduğunu düşünür. Təbii ki, müharibə senarisi də erməni tərəfi üçün fəlakət deməkdir. Çıxılmaz vəziyyətdə qalan Paşinyan xarici havadarlarına "bizi sülhə məcbur etməyin və buna mane olun" mesajını vermək istəyir. Sülh Azərbaycan üçün hüquqi sənəddən başqa bir əhəmiyyət kəsb etməyəcək. Tarixi torpaqlarımızın geri istənilməsinin qarşısını heç bir sülh müqaviləsi ala bilməz".
