ABŞ Prezidenti Donald Tramp administrasiyası Marko Rubionun ən azı altı ay müddətində həm dövlət katibi, həm də milli təhlükəsizlik üzrə müşavir vəzifələrini paralel şəkildə yerinə yetirməsini planlaşdırır.
Trend-in "Politico" qəzetinə istinadən verdiyi məlumata görə, bu, müvəqqəti deyil, daha uzunmüddətli bir plan kimi nəzərdə tutulub. Qeyd olunur ki, Rubionun əvvəlcə yalnız dövlət katibi postunu icra etməsi nəzərdə tutulurdu, lakin bu qərarın dəyişdirilməsi Trampın və onun aparat rəhbərinin şəxsi istəyi ilə olub.
Xatırladaq ki, Tramp mayın 1-də sabiq milli təhlükəsizlik müşaviri Maykl Uoltsun BMT-dəki ABŞ daimi nümayəndəsi vəzifəsinə təyin edəcəyini açıqlamışdı. Beləliklə, Rubionun müvəqqəti olaraq bu vəzifəni də icra etməsi qərara alınıb.
Qeyd edək ki, ABŞ tarixində sonuncu dəfə 1973-1975-ci illərdə Henri Kissincer eyni vaxtda həm dövlət katibi, həm də prezidentin milli təhlükəsizlik üzrə müşaviri vəzifələrində çalışıb.
