“Avropa Şurasının siyasi fəlsəfəsinin bir xüsusiyyəti var. Bu xüsusiyyət türk-müsəlman ölkələrinə qarşı ikili standartlarla çıxış etmək və qeyri-səmimi münasibət göstərməkdir”. Bunu Sherg.az-a açıqlamasında Bakı Politoloqlar Klubunun rəhbəri Zaur Məmmədov deyib.
Politoloq bildirib ki, hansısa müstəvidə Avropa ölkələri Türkiyə ilə siyasi-hərbi müttəfiq olduqlarını iddia edirlər. Hətta müəyyən dövrlərdə Azərbaycanı özlərinə enerji partnyoru sayırlar:
“Lakin xristian Avropa Şurası hər zaman bölgənin kiçik etnik qruplarını dəstəkləyir və onlardan Azərbaycana, Türkiyəyə qarşı istifadə edirlər. Bu anti-türk siyasətinin əsası 100 il əvvəl qoyulub. O vaxt okeanın o tayından bizim ərazilərdə Ermənistan dövləti yaradılması tələbi irəli sürülüb və bunu reallaşdırmaq üçün əllərindən gələni ediblər. Əfsuslar olsun ki, yüz il sonra da Qərb ölkələrinin yanaşmasında müsbətə doğru dəyişiklik yoxdur. Avropa Şurasının Azərbaycan əleyhinə qətnamə hazırlaması, ancaq işğalçı Ermənistanla və Nikol Paşinyanın repressiyaları ilə bağlı bəyanat verilməməsi həqiqəti ortaya qoyur”.
Zaur Məmmədov: “Prezident İlham Əliyevin uzaqgörənliyi odur ki, dövlət başçısı xarici siyasətdə kimin hansı simaya malik olduğunu yaxşı görür”
Z.Məmmədovun sözlərinə görə, Qərb institutları öz mahiyyətini açıq-aşkar sərgiləyir:
“Prezident İlham Əliyevin uzaqgörənliyi odur ki, dövlət başçısı xarici siyasətdə kimin hansı simaya malik olduğunu yaxşı görür. Ona görə də Azərbaycanın xarici siyasəti milli maraqlara söykənir və optimal sayılır. Siyasi proseslər onu göstərir ki, Azərbaycanın yürütdüyü balanslı siyasət ən düzgünüdür. Münasibətlərin normallaşması üçün Avropa Şurasının təmsilçiləri ağı qaradan seçməyi bacarmalıdır”.
