Azərbaycan Prezidenti İlham Əliyevin və Türkiyə Prezidenti Rəcəb Tayyib Ərdoğanın iştirakı ilə Kahramanmaraşda Azərbaycanın zəlzələdən zərərçəkənlər üçün tikdiyi məhəllənin açılışı olacaq.
Bu barədə Türkiyə səfiri Birol Akgün məlumat verib.
Səfir qeyd edib ki, açılış mərasimi iyun ayında baş tutacaq, lakin dəqiq tarix hələ bəlli deyil.
Diaspor üzrə araşdırmaçı-ekspert, Türk Ağsaqqalları İctimai Birliyinin (TAİB) sədr müavini Elnur Eltürk Sherg.az-a vurğulayıb ki, Azərbaycan-Türkiyə qardaşlığından söz açarkən mütləq tarixə nəzər salmaq lazımdır:
“Belə ki, əsrin əvvəllərində Balkan və Birinci Dünya müharibəsində Azərbaycan türkləri Osmanlının yanında idilər. 1915-ci ildə Çanaqqala savaşı buna ən böyük örnəkdir. Daha sonra, 1918-ci ildə Qafqaz İslam Ordusunun Azərbaycanın qurtuluşunda iştirakı faktı bu gün tarixi əlaqələrimizin qurulmasında böyük rol oynayır. Bizi birləşdirən tarixi dəyərlərlə yanaşı, hazırda yüksək səviyyədə inkişaf edən siyasi, iqtisadi və hərbi-strateji əlaqələrimizi də yaddan çıxarmaq olmaz. Münasibətlərimizdəki qardaşlıq beynəlxalq müstəvidə də açıq şəkildə özünü göstərir. Hər iki qardaş ölkə istər regional, istərsə də geosiyasi düzəndə birgə mövqedən çıxış edirlər. Bu, iki qardaş ölkənin birgə gücünü nümayiş etdirir. Bizi həm sevincimiz, həm də kədərimiz birləşdirir. Bunlarla yanaşı, hər iki ölkənin liderlərinin qardaşlıq münasibətləri əlaqələrimizin inkişafını dinamik səviyyədə saxlayır. Kahramanmaraşda Azərbaycanın zəlzələdən zərərçəkənlər üçün tikdiyi məhəllə qardaşlığımızın gerçək örnəyidir. Bu, həm də onu göstərir ki, hər iki qardaş ölkə sözdə yox, əməldə birgədir. Bundan gözəl örnək ola bilməz”.
