"Azərbaycan və Gürcüstan dost və tərəfdaş ölkələrdir".
Bunu "Report"un yerli bürosuna açıqlamasında Gürcüstan müdafiə nazirinin müavini Giorgi Xaindrava noyabrın 22-də Tbilisidə Azərbaycan müdafiə nazirinin müavinləri - Baş direktor Aqil Qurbanov və Hərbi Hava Qüvvələrinin Komandanı general-leytenant Ramiz Tahirovla danışıqlardan sonra deyib.
Onun sözlərinə görə, Azərbaycan və Gürcüstan regionun güclənməsi üçün çalışır:
"Ölkələrimiz arasında uzun illərdir ki, dostluq və tərəfdaşlıq əlaqələrimiz var. Əlaqələrimiz gün keçdikcə daha da genişlənir. Bu gün azərbaycanlı həmkarlarımızı "Delta" Dövlət Hərbi Elmi-Texniki mərkəzi ilə tanış etdik. Onları istehsal etdiyimiz silah və texnikalar haqqında məlumatlandırdıq".
Qeyd edək ki, A.Qurbanov və R.Tahirov səfər çərçivəsində Gürcüstan müdafiə nazirinin müavini Giorgi Xaindrava və Müdafiə Qüvvələri komandanı general-mayor Giorgi Matiaşvili ilə görüşüblər.
Müdafiə Nazirliyində keçirilən görüşdə hərbi, hərbi texniki, hərbi təhsil sahələrində əməkdaşlığın daha da genişləndirilməsi və qarşılıqlı maraq doğuran bir sıra məsələlər müzakirə edilib.
