“Əldə etdiyimiz qələbəni dövlət başçısı hüquqi cəhətdən, beynəlxalq aləmin vasitəsilə təsdiqlədi”
“İndi heç kəs Azərbaycanın ərazi bütövlüyü təmin olunandan sonra ora yerləşdirilən sülhməramlılara etiraz edə bilməz”
Türkiyənin Xarici İşlər naziri Mövlud Çavuşoğlu və rusiyalı həmkarı Sergey Lavrov arasında telefon danışığı olub. Bu barədə CNN Türk məlumat yayıb. XİN başçıları telefon danışığı zamanı Dağlıq Qarabağ münaqişəsini müzakirə ediblər. Rusiyanın iştirakı ilə imzalanan bəyanatdan sonra döyüşlər tamamilə dayandırıldı. Beləliklə, Dağlıq Qarabağ müharibəsinin həlli bundan sonra diplomatik istiqamətdə davam edəcək.
AŞPA-nın Azərbaycan nümayəndə heyətinin sədri, millət vəkili Səməd Seyidov nazirlərin telefon danışığı ilə bağlı fikirlərini “Sherg.az”la bölüşüb:
“İndi konfliktin həlli istiqamətində ikinci mərhələ başlayıb. Odur ki, belə telefon danışıqları normaldır. Hətta yaxın günlərdə təmasların intensivləşəcəyi də gözlənilə bilər. Biz ərazi bütövlüyümüzü təkcə işğal edilmiş torpaqlarda deyil, bütöv Qarabağda təmin etdik. Və bu, imzalanan bəyanatda öz əksini tapdı. Fikrimcə, belə bir bəyanatın qüvvəyə minməsi ən düzgün qərar idi”.
S. Seyidov, həmçinin sənədin əhəmiyyətindən də danışıb:
“Şuşanın, bir gündə 70 kəndin azad olunması ordumuzun gücündən, peşəkarlığından xəbər verir. Biz ərazilərimizi azad etdik. Ardınca isə sözegədən bəyanatla qələbəmizi əbəliləşdirməklə yanaşı, həm də bu uğuru dünyanın qəbullanmasını təmin etdik. Beynəlxalq strukturları qazandığımız qələbənin altında imza çəkmələrini təmin etmək lazım idi və biz bunu bacardıq.
Həmişə demişəm: Azərbaycan 3 ayrı Ermənistanla mübarizə aparır. Birincisi, məğlub etdiyimiz dövlət, üçüncüsü böyük güclərin əlində oyuncaq olan Ermənistandır. Həmin oyuncağı da dünya güclərinin əlindən aldıq. Amma ikinci- dünyada yayılmış erməniçilik hələ qalıb.
Bu, provokasiya xarakterli yazılar, prezidentimizə verilən suallar, yayılan dezinformasiyalardır. Düşmən dünya güclərini Azərbaycana qarşı qaldırmaqdan ötrü bəhanə axtarırdı. Bir az obrazlı desək, əlini ovuşdururdu. Lakin biz onların bu planlarını da ürəklərində qoyduq. İndi heç kim BMT-nin Qaçqınlar üzrə komitəsinə qarşı çıxa bilməz. İndi heç kəs Azərbaycanın ərazi bütövlüyü təmin olunandan sonra ora yerləşdirilən sülhməramlılara etiraz edə bilməz.
Deməyim odur ki, hərbi yolla əldə etdiyimiz qələbəni dövlət başçısı hüquqi cəhətdən, beynəlxalq aləmin vasitəsilə təsdiqlədi və dünyaya bəyan etdi. Məsələni soyuqqanlı təhlil edə bilən hər kəs bunu asanlıqla görə, anlaya bilər”.
