Rus ekspertlərin açıqlamaları mahiyyət etibarilə heç nəyi dəyişdirmir
"Kreml Bakını ekspert cameəsi üzərindən təhdid edir". Bu barədə siyasi şərhçi Asif Nərimanlı deyib. Analitik bildirib ki, neft mədənlərini bombalamağa çağıran Hərbi-Siyasi Araşdırmalar Mərkəzinin aparıcı eksperti Mixail Aleksandrovdan sonra Raket və Artilleriya Elmləri üzrə İnformasiya Siyasəti Akademiyasının prezident müavini, hərbi elmlər doktoru Konstantin Sivkov da “Kiyevdən sonra Bakı ilə məşğul olacağıq” açıqlamasını verib:
"Aleksandrov vəzifəsindən uzaqlaşdırılıb. Azərbaycan onu beynəlxalq axtarışa verib. Sivkovla bağlı da eyni addım atıla bilər. Rus ekspertlərin açıqlamaları mahiyyət etibarilə heç nəyi dəyişdirmir, əvəzində “cəzalanırlar”.
Bundan öncə Delyagin də “Bakıya hücum çağırışı”na görə beynəlxalq axtarışa verilmişdi.
Aleksandrovun işdən çıxarılması Kremlin də onları qorumadığı fikrini yaradır və belə təəssürat yaranır ki, “onlar özbaşına danışır, yaxud erməni lobbisi danışdırır”.
Hərçənd, rus ekspertlərin Bakını təhdid etməsinin zamanı xüsusilə diqqət çəkir.
Dövlət Dumasının deputatı Mixail Delyagin bu ilin mart ayında Bakını təhdid edəndə Azərbaycan Ordusu Fərrux əməliyyatını keçirmişdi. Xankəndi yolunda aksiyanın davam etdiyi vaxt Aleksandrovla Sivkov təhdidlər irəli sürdülər.
Bakının Qarabağda Moskvanın marağında olmayan addımlar atanda rus ekspertlərin aktivləşməsi təhdidin arxasında Kremlin dayandığı fikrini gücləndirir.
Bu “ekspertlərin” Rusiya rəhbərliyinə qarşı bəzən tənqidi fikirləri ilə seçilməsi isə onların Kremldən sifariş aldıqları versiyasını zəiflədə bilər. Əslində klassik üslubdur, Jirinovski də Rusiya hakimiyyətinin siyasətini tənqid edirdi.
Amma həm də “təhdid dili” olaraq istifadə olunurdu. İndi jirinovskilərin sayı çoxalıb. Görünür, onun “postu” uğrunda da mübarizə gedir".
