“İranla Rusiya arasında qarşıdakı 20 il müddətində əhatəli əməkdaşlığa dair sənəd üzərində iş yaxın zamanlarda başa çatacaq”.
“Report” İLNA-ya istinadən xəbər verir ki, bunu İran Xarici İşlər Nazirliyinin sözçüsü Səid Xətibzadə dekabrın 11-də keçirdiyi brifinqdə deyib.
“Biz Xarici İşlər Nazirliyində yeni proqram yaratmışıq. Qonşu dövlətlərlə qarşıdakı 20 ili əhatə edəcək “yol xəritəsi” hazırlamışıq. Rusiya ilə bu proses artıq başa çatıb”, S.Xətibzadə bildirib.
Onun sözlərinə görə, oxşar müqavilə artıq Çinlə 25 illyinə imzalanıb.
Qeyd edək ki, bu il noyabrın 16-da İran Prezidenti İbrahim Rəisi ilə Rusiyanın dövlət başçısı Vladimir Putin arasında telefon danışığı olub. İran rəhbəri həmin danışıq zamanı rəsmi Tehranın Moskva ilə əhatəli əməkdaşlıq üzrə uzunmüddətli müqavilə imzalamağa hazır olduğunu bildirmişdi.
