Fransa Prezidenti Emmanuel Makron bu həftə Çexiyanın Avropa Birliyinə daxil olmayan ölkələrdən Ukraynaya yüz minlərlə artilleriya mərmisi tədarükü təklifini dəstəkləyəcəyini açıqlayacaq.
Bu barədə “Blumberq” mənbəyə istinadla məlumat yayıb.
“Almaniya, Niderland və Danimarka da bu təşəbbüsə qoşulacaq. Makron bu gün Praqaya səfəri zamanı bu təklifi Çexiyanın Baş naziri Petr Fiala ilə müzakirə edəcək. Bu həftə təfərrüatı razılaşdırmaq üçün AB müdafiə və xarici işlər nazirləri arasında ayrıca müzakirənin də baş tutacağı gözlənilir”, - agentlik bildirib.
Mövzu ilə bağlı “Sherg.az”a danışan tanınmış jurnalist, siyasi şərhçı Elçin Alıoğlu vurğulayıb ki, Emmanuel Makron bir müddət əvvəl NATO ölkələrinin Ukraynaya hərbi kontingent göndərmələri ilə bağlı fikir bildirmişdi:
“Bu isə təbii olaraq çox marazmatik açıqlama idi. Şimali Atlantika Alyansının bilavasitə hərbi əməliyyatlara qoşulması müharibənin regionunu və coğrafiyasını dəfələrlə artıra bilər. Eyni zamanda Üçüncü Dünya savaşının kazus bellinə çevrilərdi. Ona görə də Avropa İttifaqı (Aİ) və NATO ölkələri bu təklifi absurd saydılar. Makron isə ikinci çıxışında qeyd etdiki, mən bunu düşünərək və hesablayaraq demişəm. Lakin biraz sonra Fransanın xarici işlər naziri və senatın spikeri açıqlamanın tamamilə mənasız olduğunu söylədilər. Yəni Makron öz çıxışını təkzib etdi. İndi isə mülki avtomobillər vasitəsilə silah-sursatın Ukraynaya daşınması barədə faktlar mövcuddur. Məsələn, Almaniya, Polşa və Ruminiyadan bu cür daşınmalar həyata keçirilir. Bu daşınmalar isə Ukraynanın Qərbi ilə Şərqi Avropa ölkələri arasında nəqliyyat əlaqəsini legitim hərbi hədəfə çevirir. Rusiya istənilən an ağır tonlu yük maşınını hərbi hədəf elan edərək vura bilər. Həmin zaman da Rusiyanın əlində sübut olacaq ki, Avropa və NATO ölkələri özləri belə daşınmaların olduğunu bildirir”.
Ekspert onu da söyləyib ki, müharibə yaxın aylarda, hətta illərdə səngiməyəcək:
“Çünki nə Ukraynanın genişmiqyaslı hücuma keçməsi üçün potensialı var, nə də Rusiyanın bu hücumu gerçəkləşdirmək üçün gücü mövcuddur. Xırda taktiki döyüşlər isə ümumi strateji uğurun məğzini təşkil etmir. Ona görə də Makronun bəyanatları yaranmış sutiasiyanı sakitləşdirmək əvəzinə daha da kəskinləşdirir. Özünü Napoleon Bonapart hesab edən Makron Avropa İttifaqı, NATO və Rusiya arasında gərginliyi pik nöqtəyə çıxarmaqla məşğuldur”.
