“Gürcüstan Azərbaycan ilə Ermənistan arasında münasibətlərin normallaşması prosesini böyük maraqla izləyir və bunun üçün platforma təqdim etməyə hazırdır”.
“Report” xəbər verir ki, bunu Gürcüstanın sabiq prezidenti Georgi Marqvelaşvili deyib.
"Ümid edirəm ki, proses Azərbaycan və Ermənistan arasında münasibətlərin sabitləşməsinə doğru gedir. Azərbaycan Gürcüstanın strateji tərəfdaşıdır, Ermənistan da bizə yaxın dövlətdir. Buna görə də Gürcüstan region üçün nəyin ən yaxşı olduğunu müzakirə etmək üçün platforma təqdim etməkdə maraqlıdır. ATƏT-in Minsk Qrupunun artıq mövcud olmadığını nəzərə alsaq, bu, xüsusilə vacibdir”, - Marqvelaşvili bildirib.
“Bakı forumu illər ərzində yanaşmaları sınaqdan keçirmək, bilikləri bölüşmək və müxtəlif dövlətlərin təcrübələrini öyrənmək baxımından çox faydalı platformaya çevrilib”, - Gürcüstanın sabiq prezidenti deyib. O, tədbirin məzmun, logistika və iştirakçılar baxımından yaxşı təşkil olunduğunu bildirib.
“Bu forumu təşkil etdiyinə görə Prezident İlham Əliyevə təşəkkür etmək istəyirəm”, - Gürcüstanın sabiq prezidenti əlavə edib.
Marqvelaşvili forum çərçivəsində Gürcüstanda baş verən hadisələrdən də danışmaq niyyətində olduğunu qeyd edib. "Hazırda Gürcüstanda sabitlik ciddi şəkildə pozulub, çünki hakimiyyət faktiki olaraq Rusiya və Kreml yönümlü siyasətə keçib. Cəmiyyət isə bunun əleyhinədir", - o deyib.
