Rusiya nəzarəti altına altığı Ukrayna ərazilərinin heç birini geri qaytarmaq niyyətində olmadığını açıqlayıb. Bunu Rusiya Federasiya Şurasının sədri Valentina Matviyenko bildirib. O, həmin ərazilərin Rusiyanın tərkib hissəsi olduğunu deyib: “Bizim konstitusiyamız Rusiyadan hər hansı torpağın qoparılmasını qadağan edir. Bunu hər kəs eşitməlidir. 4 birləşmiş ərazi ilə bağlı heç bir güzəşt ola bilməz və olmayacaq”.
Matviyenkonun sözlərinə görə Rusiyanın maraqları və torpaq reallıqlarının nəzərə alınacağı təqdirdə Ukrayna ilə danışıqlara hazır olduğunu qeyd edib.
Matviyenkonun fikirlərini “Sherg.az”a dəyərləndirən politoloq Zeynal Əmrəliyev bildirib ki, Rusiya əvvəllər də Ukraynada tutduğu əraziləri geri qaytarmayacağı ilə bağlı açıqlamalar verib:
"Rusiyat sözügedən məsələyə hüquqi don geyindirərək həmin əraziləri işğal və ilhaq edib. Bu isə beynəlxalq hüququn çeynənilməsidir. Hazırda beynəlxalq hüquq Yaxın Şərq məsələsinə və Rusiya-Ukrayna müharibəsinə görə ciddi şəkildə böhran yaşayır. Valentina Matviyenkonun açıqlaması Rusiyanın bu məsələdə qərarlı olduğunu göstərir. Matviyenko özünün sərt mövqeyi ilə seçilir və Putin hakimiyyətinin əsas simalarından biridir. Matviyenkonun açıqlaması Putin hakimiyyətinin mövqeyini tamamilə ortaya qoyur”.
Ekspert vurğulayıb ki, Ukrayna savaşının dayandırılmasının həlli uzun müddətdir mümkün deyil:
“Müharibənin həll yolu dərhal danışıqları bərpa etməkdir. Ukrayna tərəfdaşları ilə birlikdə Rusiyanı danışıqlar masasına oturtmağa çalışmalıdır. Əks halda müharibə getdikcə Ukraynanın əleyhinə işləyəcək. Ukrayna Qərbdən istədiyi dəstəyi ala bilmir. Amerika Birləşmiş Ştatlarında prezident seçkiləri yaxınlaşır. Seçkilərdə Donald Trampın yenidən prezident olma ehtimalı böyükdür. Bu isə Ukraynaya sərf edən məsələ deyil. Ona görə də Zelenski münaqişənin ziyanına işləməsinə imkan verməməli və danışıqlar masasına əyləşməlidir".
