Paşinyan isə təmaslar üçün Moskvanı yox, Tbilisini daha uyğun məkan hesab edir
Dünən Rusiya dövlət başçısı Vladimir Putin Azərbaycan Prezidenti İlham Əliyevə zəng edib. Telefon söhbəti zamanı Rusiya, Azərbaycan və Ermənistan liderlərinin 10 noyabr, 11 yanvar və 26 noyabr, həmçinin bu il 31 oktyabr tarixli razılaşmalarının reallaşdırılmasının bəzi praktik aspektləri, o cümlədən Cənubi Qafqazda iqtisadi və logistik əlaqələrin bərpası planları müzakirə edilib. Dövlət başçıları gələcək təmaslar barədə də fikir mübadiləsi aparıblar. Xatırladaq ki, Ermənistan baş naziri Nikol Paşinyan Azərbaycan, Gürcüstan və Ermənistanın regional dialoq formatının qurulmasını təklif edib. Baş nazir bildirib ki, İrəvan yeni olmayan bu ideyanı hər zaman dəstəkləyib.
Paşinyan həmçinin vurğulayıb ki, sülhün bərqərar olması üçün regional münasibətlərin məzmunu və keyfiyyəti dəyişməlidir: “Bunun üçün sadə, amma vacib məsələlərdən başlamaq lazımdır”.
Kreml-Bakı arasında təmasları və Paşinyanın görüş təklifini "Şərq"ə dəyərləndirən Milli Cəbhə Partiyasının sədr müavini Məhəmməd Əsədullazadə deyib ki, Putin Azərbaycan və Ermənistan liderlərinin növbəti görüşünü təşkil etməyə çalışır. Ekspert Rusiya rəhbərinin zənginin sülhməramlı qüvvələrlə bağlı Moskvaya nota verilməsi, Laçın yolunda yumşaq gücdən istifadə edilməsi fonunda baş verməsinə diqqət çəkib:
"Putin telefon danışığında ənənəvi olaraq əldə olunan üçtərəfli razılaşmaların yerinə yetirilməsinin vacibliyindən danışıb. Halbuki Rusiya özü razılaşmaların icrasını əngəlləyən əsas tərəfdir. Moskva Azərbaycan və Ermənistan liderlərinin növbəti görüşünün keçirilməsində maraqlıdır. Məhz Putinin Prezident İlham Əliyevlə telefon danışığında Nikol Paşinyanla görüşün keçirilməsinin təklif edilməsi istisna deyil. Rusiya təşəbbüsün Vaşinqtonun əlinə keçməməsi üçün görüş təyin edir. Əlbəttə, rəsmi Bakı görüşlərin müsbət sonluqla nəticələnməsində maraqlıdır. Dekabrın 7-də keçirilməsi nəzərdə tutulan Brüssel görüşü məhz müsbət nəticəyə ümid olmadığından təxirə düşdü. İndi Nikol Paşinyan yeni görüş üçün Tbilisini uyğun görür. Əslində, Tbilisidə görüş Azərbaycanın bir neçə ay öncə irəli sürdüyü təklifdir. Vaşinqton da bu təklifi dəstəkləyib. Tbilisi görüşü Moskva və Brüsseldən fərqli olaraq daha müsbət atmosferdə keçə bilər. Görünür, ABŞ Paşinyana ciddi təzyiq göstərdiyi üçün baş nazir Moskva yox, Tbilisi görüşündə maraqlı olduğunu deyir. Putinin "əl-ayağa düşməsinin" səbəbi budur".
